گەنجێکی کەڵەکچی لە کۆلێژی ئیمام ئەعزەم یەکەمی سەر بەشەکەی دەبێت

ئاڤا نیوز

گەنجێکی کوردی دانیشتووی ناحیەی کەڵەکچی لە قەزای شێخان لە پارێزگای دهۆک، یەکەمی بەشی زمانی عەرەبی دەبێت لە کۆلێژی ئیمام ئەعزەم لە شاری مووسڵ.

چیرۆکی سەرەکی: سەعد سعوود نەجم، کوڕە کوردێکی دانیشتووی گوندی دەروێشانە لە ناحیەی کەڵەکچیی سنووری قەزای شێخان لە پارێزگای دهۆک. ئەو گەنجە لە بەشی زمانی عەرەبی لە کۆلێژی ئیمام ئەعزەم لە لقی موسڵ یەکەم بووە، لە ئاستی بەشی عەرەبی سەرجەم لقەکانی کۆلێژەکە لەنێو سەدان قوتابی عەرەب دەیەم بووە.

ئەوەی پێویستە بیزانیت: ئەو بەشەی سەعد تێیدا یەکەم بووە لە موسڵ، نزیکەی 60 کەسی تێیدا دەرچووە لەو ژمارەیە 35 کەسیان عەرەب بوونە.

لێدوانی فەرمی: سەعد سعوود بە ئاڤا میدیای گوت، "لە پۆلی یەکەمی سەرەتایی تا پۆلی 12ی ئامادەیی بە زمانی کوردی خوێندوومە و خوێندنم کوردی بووە، بەڵام کاتێك چوومە بەشی عەرەبی هەموو هەوڵێکمدا بۆ ئەوەی بتوانم لەو بەشە سەرکەوتوو بم و توانیم لەسەر ئاستی بەشەکەم یەکەم بم".

زانیاریی زیاتر: کۆلێژی ئیمام ئەعزەم لە زۆربەی شارەکانی عێراق لقی هەیە و لەلایەن وەزارەتی خوێندنی باڵای حکومەتی عێراق دانی پێدانراوە، بەڵام هێشتا لەلایەن وەزارەتی خوێندنی باڵای هەرێمی کوردستان دانی پێدانەنراوە.