د. خەتاب ئەحمەد: زمانی عەرەبی لە بەش و کۆلێژەکان ڕادەگرین

ئاڤا نیوز

وەزارەتی خوێندنی باڵا و توێژینەوەی زانستی لە هەوڵدایە کە ئەو بڕیارەی لەلایەن وەزارەتی خوێندنی باڵای عێراق بۆ قەدەغەی زمانی کوری لە زانکۆکانی ناوچە کوردستانییەکان دەرچووە هەڵبوەشێنێتەوە. ئەگەر ئەم بڕیارە هەڵنەوەشێنرێتەوە، "زمانی عەرەبی لە بەش و کۆلێژەکان ڕادەگرین".

وێنە گەورەکە: ڕۆژی 15-7-2025، وەزارەتی خوێندنی باڵای عێراق، بڕیارێکی بۆ قەدەغەی وەرگێڕان لە کاتی تاقیکردەوەکان، هەروەها وەڵامدانەوە تەنیا بە زمانی عەرەبی لە زانکۆکانی کەرکووک و دیالە و موسڵ دەرکرد، ئەمەش کاردانەوەی زۆری بەدوای خۆیدا هێنا.

لێدوانی فەرمی: خەتاب ئەحمەد، بەڕێوەبەری گشتیی خوێندن و پلاندانان لە وەزارەتی خوێندنی باڵا و توێژینەوەی زانستی حکومەتی هەرێمی کوردستان، بە ئاڤا میدیا ڕاگەیاند: ئەگەر ئەم بڕیارە ڕانەگیرێت و هەڵنەوەشێنرێتەوە، ئەوا بە هەمان شێوە ئێمەش لە کۆلێژ و بەشەکانی خۆمان زمانی عەرەبی ڕادەگرین، واتا وەک خۆیان مامەڵەیان لەگەڵ دەکەین.

- ئێمە نامانەوێت بگاتە ئەو ئاستەی وەک خۆیان مامەڵەیان لەگەڵ بکەین، چونکە پەیوەندییەکانمان لەگەڵ وەزارەتی خوێندنی باڵای عێراق باشە.

- ژمارەیەک ڕێککەوتنمان لەسەر پرسە هەڵپەسێردراوەکانی نێوانمان لەگەڵ وەزارەتی خوێندنی باڵای عێراق هەیە، هەروەها چەندین پرسمان چارەسەر کردووە.

- ئەم بڕیارەی وەزارەتی خوێندنی باڵای عێراق هەموو پەیوەندیی و ڕێککەوتنەکانمان دەباتەوە خاڵی سفر.

- هەوڵدەدەین ئەم بابەتە لە ڕێگەی نوێنەرانی کورد لە بەغدا و دامەزراوەکانمان لە بنەڕەتەوە چارەسەر بکەین.

- وەزیری خوێندنی باڵای عێراق بەڵێنی هەڵوەشاندنەوەی بڕیارەکەی داوە، بەڵام ئەمە هێشتا نەبووە بە فەرمی.

کاریگەریی و لێکەوتەکان: دوای دەرچوونی بڕیارەکەی وەزارەتی خوێندنی باڵای عێراق، چەندین کەسایەتی و دامەزراوەی فەرمی لە کوردستان ئیدانەی بڕیارەکە و داوای هەڵوەشاندنەوەیان کرد.