ڕۆبیۆ: ترەمپ بەهۆی جەنگی رووسیا و ئۆکرایناوە ئارامی نەماوە

ئاڤا نیوز

تاوەکو ئێستا رووسیا و ئۆکراینا نەگەیشتوونەتە ڕێککەوتن، وەزیری دەرەوەی ئەمریکا لەبارەی ئەمەوە ئاشکرای دەکات ترەمپ سەبر و ئارامی نەماوە بەهۆی ئەم جەنگەوە.

وێنە گەورەکە: جەنگی ڕووسیا و ئۆکراینا ماوەی سێ ساڵ زیاترە بەردەوامە، سەرەڕای تەواوی هەوڵەکانی ئەمریکا بەڵام نەبووەتە هۆی بەدیهێنانی ئاگربەستێکی گشتگیر، دوای ئەو هەوڵانەش کە دەرئەنجامێکی بەرچاویان بەدەست نەهێنا، دۆناڵد ترەمپ، سەرۆکی ئەمریکا 50 ڕۆژ مۆڵەتی بە ڕووسیا دا بۆ ئەوەی لەگەڵ ئۆکراینا بگاتە ڕێککەوتن. 

لێدوانی فەرمی: مارکۆ ڕوبیۆ، وەزیری دەرەوەی ئەمریکا بە فۆکس نیوزی ڕاگەیاندووە، ''دۆناڵد ترەمپ، سەرۆکی ئەمریکا دەیەوێت جەنگی ئۆکراینا و ڕووسیا ڕابگرێت و کۆتایی بە شەڕەکە بهێنێت، کاتی ئەوە هاتووە هەنگاو بنێن و سەرۆک زۆر بە ڕوونی ڕایگەیاندووە 'ئارامی نەماوە'، بەدەست جەنگی ڕووسیا و ئۆکرانیا ئەمە شەڕی ترەمپ نییە، بەڵام دەیەوێت کۆتایی پێبێت''.

کاریگەری و لێکەوتەکان: ئەم پێشهاتە لە کاتێکدایە کە پێشڕەوییەکانی ڕووسیا بەردەوامن، وەزارەتی بەرگریی ڕووسیا ڕایگەیاند کە هێزەکانیان دوو گوندی نوێیان لە ناوچەی دنیپرۆپترۆڤسک و دۆنێتسکی ئۆکراینا کۆنترۆڵ کردووە.

زانیاریی زیاتر: تاوەکو ئێستا هەردوو شاندی ڕووسی و ئۆکراینی بۆ گەیشتن بە ڕێککەوتنی ئاشتی سێ گەڕی دانوستانیان لە تورکیا ئەنجامداوە، 2025-05-16، یەکەم گەڕی دانوستانەکان بەڕێوەچوو، 2025-06-02 دووەم گەڕی دانووستانەکان و 2025-07-23 سێیەم گەڕی دانوستان لەنێوان هەردوو شاندی ڕووسی و ئۆکراینی بەڕێوەچوو