24 گەنج لە لیبیاوە دەگەڕێنرێنەوە هەرێمی کوردستان

ئاڤا نیوز

ئەو 24 گەنجەی هەرێمی کوردستان کە لە فڕۆکەخانەی بەنغازی لیبیا گیریان خواردبوو، دەگەڕێنەوە فڕۆکەخانەی هەولێر. 

وێنە گەورەکە: گەنجانی هەرێمی کوردستان و بەشێکی دیکەی وڵاتانی ناوچەکە بۆ گەیشتن بە کەناراوەکانی ئیتاڵیا و ئەوروپا ڕێگای لیبیا بەکاردەهێنن، لە ماوەی ڕابردوو چەند گەنجێکی کۆچبەری کورد بەو مەبەستە ڕوویان کردووەتە لیبیا، بە جۆرێک دەیان کەسیان لێ دەستگیر کراوە و ڕووبەڕووی تووندوتیژی و بارودۆخێکی نەخوازراو بوونەتەوە، بەشێکیشیان توانیویانە بگەنە کەناراوەکانی ئیتاڵیا.

لێدوانی فەرمی: عەلی خەلیفە، باوکی یەکێک لەو گەنجانە بە ئاڤای ڕاگەیاند: بەپێی ئەو بلیتەی بۆ ئەو گەنجانە دەستبەر کراوە، کاتژمێر 1:20 خولەکی نیوەڕۆ بە کاتی لیبیا بەرەو ئیستەنبووڵ بەڕێکەوتوون و کاتژمێر 4 گەیشتوونەتە شوێنی دیاری کراو، ئەمشەو لە شاری ئیستەنبووڵ دەمێننەوە و سبەی دووشەممە، کاتژمێر 9ـی بەیانی دەگەنە فرۆکەخانەی نێودەوڵەتیی هەولێر.

ئەوەی پێویستە بیزانیت: ئاڤا پێشتر شوێنی مانەوەی ئەو 24 گەنجەی لەڕێگەی "ئەپڵ ئایدی" سەر موبایلی یەکێکیان لە تەرابلووسی پایتەختی لیبیا ئاشکرا کرد کە ئاسایشی گشتیی تەرابلووس بووە، دواتر ئاڤا د. ئەحمەد سەحاف، هەڵسوڕینەری باڵیۆزخانەی عێراق لە لیبیا و لایەنە پەیوەندیدارەکانی لە دەستگیرکردنی ئەو گەنجانە ئاگادار کردەوە، دوای هەوڵێکی زۆر ئازاد کران.

باکگراوند: بەیانی ڕۆژی یەکشەممە 2025-06-29، 24 گەنجی کوردستان بەرەوە لیبیا بەڕێکەوتن، لە قاهیرەی میسر دابەزین و 30ـی مانگ چوونەتە بەنغازی لە لیبیا، لە 1ـی ئەم مانگە بەرەو تەرابلووس بەڕێکەوتن، لە نێوان میسراتە و ئەلخومس دەستگیر کراون.