میدیای ئیسرائیل: زیاتر لە 18 هەزار سەرباز ئیسرائیل لە سەرەتای شەڕی غەززەوە برینداربوون

ئاڤا نیوز

ڕۆژنامەیەکی عیبری ئاشکرای کردووە، لە سەرەتای شەڕی سەر کەرتی غەززە لە 7ی ئۆکتۆبەری 2023ـەوە، 18 هەزار 500 سەرباز و ئەندامی هێزە ئەمنییەکانی ئیسرائیل بریندار بوون.

چیرۆکی سەرەکی: 7ی ئۆکتۆبەری 2023، بزووتنەوەی حەماس هێرشی کردە سەر ئیسرائیل و بە دەیان کەس کوژران و برینداربوون و بە دەیانی دیکەشی وەک بارمەتە ڕفاند، لە کاردانەوەی ئەو هێرشەدا، سوپای ئیسرائیل هێرشی کردە سەر کەرتی غەززە و بە ئامانجگرتنی سەرکردە سیاسیی و سەربازییەکانی حەماس و حیزبوڵڵا لە فەلەستین و لوبنان و سووریا. بەو هۆیەوە تاوەکو ئێستا هەزاران کەس کوژران و بریندار بوون.

بڵاوکراوی فەرمی: بەپێی ڕۆژنامەی "یەدیعۆت ئەحرۆنۆت"، ئەم ژمارەیە زۆر زیاترە لەو ئامارە فەرمییەی کە سوپای ئیسرائیل بڵاوی کردووەتەوە کە تەنیا باسی برینداربوونی شەش هەزار و 145 سەرباز دەکات.

ڕۆژنامەکە ئاماژەی بەوەش کردووە، ئیسرائیل چاودێرییەکی سەربازیی تووندی لەسەر میدیاکان داناوە بۆ شاردنەوەی زیانە گیانی و ماددییەکان.

ژمارەکان وادەڵێن: جگە لە بریندارە جەستەییەکان، زیاتر لە 10 هەزار سەرباز بەهۆی شڵەژانی دەروونییەوە چارەسەر وەردەگرن. لەنێو ئەوانەدا، تا ئێستا دەرکەوتووە کە سێ هەزار 769 سەرباز تووشی "شڵەژانی پاش زەبر" (PTSD) بوون کە هەزار و 600 کەسیان تەنیا لە ساڵی 2024دا تۆمار کراون.

لەهەمان کاتدا: سوپای ئیسرائیل ڕایگەیاندووە کە تەنیا لە ساڵی 2024ـدا، نۆ هەزار سەرباز داوایان پێشکەش کردووە بۆ ئەوەی وەک تووشبووی کێشەی دەروونی بناسرێن.

ئەوەی پێویستە بیزانیت: ئەم ئامارانە لە کاتێکدایە کە شەڕی ئیسرائیل بۆ سەر غەززە بووەتە هۆی کوژران و برینداربوونی زیاتر لە 204 هەزار فەڵەستینی، زۆرینەیان ژن و منداڵن، لەگەڵ بێسەروشوێنبوونی زیاتر لە نۆ هەزار کەسی دیکە.