سەرەتای مانگی ئاب کۆمیسیۆنی پرۆسەی ئاشتی تورکیا دەستبەکاردەبێت

ئاڤا نیوز

نوعمان کورتوڵمووش، سەرۆکی پەرلەمانی تورکیا ڕایگەیاند، لە سەرەتای مانگی ئاب دا کۆمیسیۆنی تایبەت بە پرۆسەی ئاشتی پێکهێنراوە، دەست بە کارەکانی دەکات.

وێنە گەورەکە: پرۆسەی ئاشتی دەچێتە پەرلەمانی تورکیا و کۆمیسیۆنێکی 51 ئەندامی بۆ پێکهێنراوە کە بڕیار وایە لەسەرەتای مانگی ئاب دەست بە کارەکانی بکات و یاداشتی داواکاری پەرلەمانتاران لە مانگی 10 پێشکەش بە سەرۆکایەتی پەرلەمانی تورکیا بکرێت و بخرێتە دەنگدانەوە.

لێدوانی فەرمی: نوعمان کورتوڵمووش، سەرۆکی پەرلەمانی تورکیا ڕایگەیاند، یەکێک لە توخمە سەرەکییەکانی پێکهێنەری تورکیا، پاراستنی یەکێتی و یەکگرتوویی ناوخۆی وڵاتە، داوا لە خەڵکی تورکیا دەکەم  بەهێزەوە پشتیوانی لە قۆناغەکە بکەن.

ئەگەر تورکیا بە سەرکەوتوویی ئاشتی ناوخۆیی، پرۆسەی ئاشتی تێپەڕ بکات، داهاتووی بەردەممان کراوەتر دەبێت. پێشکەوتنی ئێمەش وەک تورکیا هەم لە ئاستی ناوچەکە و هەم لە ئاستی جیهانی بەهێزتر دەبێت.

باکگراوند: لە11ـی تەمموز یەکەم گرووپی پەکەکە لە مەراسیمێک لە ئەشکەوتی جاسەنە لە سلێمانی چەکەکانیان سووتاند، دەم پارتی و پەکەکە دوای ئەو مەراسیمە چاوەڕێن حکومەتی تورکیا هەنگاوی جددی بۆ بەرەوپێشبردنی پرۆسەی ئاشتی بنێت.