مینحەی مانگەكانی شەش و حەوت بەسەر ئێزدییە ڕزگاربووەكان دابەش دەكرێت

ئاڤا نیوز

لە ڕۆژانی 29ـی ئەم مانگە تاوەكو 4ـی ئاب، مینحەی مانگەكانی شەش و حەوت بەسەر هاووڵاتیانی ئێزدیی ڕزگاربووی دەستی داعش دابەش دەكرێت.

وێنە گەورەكە: ئەمڕۆ یەكشەممە 27-7-2025، بنكەی ڕۆشنبیری و كۆمەڵایەتیی لالش، خشتەی دابەشكردنی پێشینەی مانگەكانی حوزەیران و تەمموزی بۆ ڕزگاربووانی دەستی داعش ڕاگەیاند كە پێشینەی دەیەمین و یازدەهەمینە پێیان دەدرێت.

ڕاگەیێنراوی فەرمی: بەپێی ڕاگەیێنراوی فەرمیی بنكەی ڕۆشنبیری و كۆمەڵایەتیی لالش، دابەشكردنی مینحەكە لە ڕۆژی سێشەممەوە 29ـی تەمموز دەستپێدەكات و تاوەكو ڕۆژی دووشەممە 4ـی ئاب بەردەوام دەبێت، سوودمەندبووان دەتوانن لە سەرجەم نووسینگەكانی بنكەی لالش لە شێخان، كۆمەڵگەی شاریا، ناوچەی خانكێ و كۆمەڵگەی دێرەبوون و بنكەی سەرەكی لالش، پاداشتەكانیان وەربگرن بەپێی ئەم خشتەیەی خوارەوە:

كۆمەڵگەی شاریا - سێشەممە 29-7-2025

ناحیەی خانكێ، قەسرێزدین - چوارشەممە 30-7-2025

كۆمەڵگەی دێرەبوون، هۆڵی لالش - پێنجشەممە 31-7-2025

قەزای شێخان، هۆڵی لالش - هەینی 1-8-2025

بارەگای سەرەكیی بنكەی لالش - شەممە 2-8-2025

بارەگەی سەرەكیی بنكەی لالش - دووشەممە 4-8-2025

ئەوەی پێویستە بیزانیت: ڕۆژی 02-07-2024، بە ئامادەبوونی سەرۆکوەزیران مەسرور بارزانی، بەرنامەی پاڵپشتی دارایی بۆ ڕزگاربووانی دەستی داعش ڕاگەیێنرا، زیاتر لە سێ هەزار و پێنجسەد كوردی ئێزدی كە پێشتر لەلایەن ڕێكخراوی تیرۆرستیی داعش ڕفێندرابوون و ئێستا ڕزگاركراون، لە وەرگرتنی ئەو مینحەیە سوودمەند دەبن.

بۆچی گرنگە: سەرۆكوەزیران مەسرور بارزانی، لە سۆنگەی باشتركردنی دۆخی ژیانی هاووڵاتیانی ئێزدی بەتایبەت ئەو ڕزگاربووانەی لەوەتەی ساڵی 2014 لەلایەن تیرۆرستانی داعش ڕفێندرابوون، بڕیاریدا بە تەرخانكردنی مینحەی مانگانە بۆیان، بەڵێنیشی داوە لەگەڵ باشتربوونی دۆخی ئابووریی هەرێمی کوردستان، مینحەکە باشتر دەبێت و پرۆژە و خزمەتگوزاریی زیاتر پێشکەشی ڕزگاربووانی ئێزدیی دەكرێت.