سوودانی: لێپرسینەوەی تووند لە ئەنجامدەرانی ڕووداوەکەی بەغدا دەکەین

ئاڤا نیوز

سەرۆکوەزیرانی عێراق و فەرماندەی گشتیی هێزە چەکدارەکان، سەرۆکایەتیی کۆبوونەوەیەکی ئەمنی خێرای کرد و دوای ڕووداوی هێرشکردنە سەر یەکێک لە فەرمانگەکانی وەزارەتی کشتوکاڵ لە بەغدا. لە کۆبوونەوەکەدا کە فەرماندە باڵا ئەمنییەکان ئامادەی بوون، سوودانی جەختی لەوە کردەوە کە هیچ لایەنێک لە سەرووی یاساوە نییە و بەڵێنی لێپرسینەوەی تووندی لە ئەنجامدەرانی ڕووداوەکە دا.

چیرۆکی سەرەکی: سەرلەبەیانی ئەمڕۆ یەکشەممە لە بەغدا و لەکاتی دەستبەکاربوونی بەڕێوەبەری یەکێک لە فەرمانگەکانی وەزارەتی کشتووکاڵ، ژمارەیەک چەکدار دەوری باڵەخانەکە دەدەن، دواتریش هێزێکی وەزارەتی ناوخۆ دەگاتە شوێنەکە و شەڕ و ڕووبەڕوبوونەوە لەنێوان هەردوولادا دروست دەبێت، لە ئەنجامیشدا دوو کەس کوژران و 12 کەسی دیکە برینداربوون و 14 چەکداریش دەستگیرکران.

ڕاگەیێنراوی فەرمی: بەگوێرەی ڕاگەیێنراوێکی نووسینگەی سەرۆکوەزیران، لە کۆبوونەوەکەدا هەریەک لە جێگری فەرماندەی ئۆپەراسیۆنە هاوبەشەکان، فەرماندەی ئۆپەراسیۆنەکانی بەغدا و ژمارەیەک لەو ئەفسەرانەی ڕووبەڕووی هێرشەکە بوونەتەوە، ئامادە بوون.

هەر بەگوێرەی ڕاگەیێنراوەکە:

- سوودانی جەختی لەوە کردەوە کە نابێت هیچ کەمتەرخەمییەک لە پاراستنی یاسا و دامەزراوەکانی دەوڵەتدا بکرێت. هەروەها داوای بەردەوامبوونی لێکۆڵینەوەکانی کرد بۆ ئاشکراکردنی چۆنیەتیی جوڵەی ئەو گرووپە چەکدارە بەبێ ڕەزامەندیی ئەمنی پێشوەختە.

- فەرماندەی گشتیی هێزە چەکدارەکان دووپاتیکردەوە، پێویستە ئەنجامدەران بەپێی یاسا ڕووبەڕووی لێپرسینەوە ببنەوە و لێکۆڵینەوەکەش بە شێوەیەکی پیشەییانە و بە چاودێریی ڕاستەوخۆی خۆی بەڕێوەدەچێت.

- سوودانی هۆشداریی دا و ڕایگەیاند: "هیچ کەسێک مافی ئەوەی نییە جێگەی دەوڵەت و دەسەڵاتەکانی بگرێتەوە و هیچ لایەنێکیش لە سەرووی یاساوە نییە."