قائانی لە بەغدا لەگەڵ چوار سەرکردەی شیعە کۆبووەوە و سوودانی نەبینی

ئاڤا نیوز

فەرماندەی فەیلەقی قودسی سوپای پاسدارانی ئێران، چەند ڕۆژێک لەمەوبەر سەردانێکی کورت و ڕانەگەیێنراوی بۆ بەغدای پایتەختی عێراق ئەنجامداوە. سەردانەکە نزیکەی 10 کاتژمێری خایاندووە، لەگەڵ ژمارەیەک سەرکردەی دیاری چوارچێوەی هەماهەنگی کۆبووەتەوە، بەڵام چاوی بە محەممەد شیاع سوودانی نەکەوتووە.

زانیاریی بەدەستهاتوو: بە گوێرەی سەرچاوەیەکی ئاگادار کە قسەی بۆ میدیای عێراق کردووە، ئیسماعیل قائانی، فەرماندەی فەیلەقی قودسی سوپای پاسدارانی ئێران، لە سەردانێکی 10 کاتژمێریی ڕانەگەیێنراودا بۆ بەغدا، بە جیا لەگەڵ هەریەک لە نووری مالیکی، سەرۆکی هاوپەیمانیی دەوڵەتی یاسا، عەممار حەکیم، سەرۆکی ڕەوتی حیکمە، هادی عامری، سەرۆکی هاوپەیمانیی فەتح و هومام حەموودی، سەرۆکی ئەنجوومەنی باڵای ئیسلامیی عێراقی کۆبووەتەوە.

زانیاریی زیاتر: یەکێک لە خاڵەکان کە جێی سەرنجی سەردانەکە بوو، ئەوە بووە کە قائانی لەگەڵ محەممەد شیاع سوودانی، سەرۆکوەزیرانی عێراق کۆنەبووەتەوە.

لەلایەکی دیکەوە: سەرچاوەکان ئاماژەیان بەوە کردووە کە گفتوگۆکان جەختیان لەسەر پێشهاتەکانی دۆخی هەرێمی، دۆخی سیاسیی عێراق، دۆسیەی هەڵبژاردنەکانی داهاتوو و ڕێڕەوی هاوپەیمانییەتییەکان لەناو چوارچێوەی هەماهەنگیدا کردووەتەوە.

ئەوەی پێویستە بیزانیت: پێشتریش فەرماندەی فەیلەقی قودس لە 28ـی حوزەیرانی ئەمساڵ بە سەردانێکی ڕانەگەیێنراو گەیشتە عێراق و لەگەڵ هەندێک لە سەرکردەکانی حەشدی شەعبی کۆبووەوە. هەروەها لە 14ـی ئایاری ئەمساڵدا، کۆبوونەوەی تاکەکەسی لەگەڵ هەندێک لە سەرکردەکانی چوارچێوەی هەماهەنگی ئەنجامدا بوو و تاوتوێی میکانیزمەکانی پشتیوانیی تاران کرابوو لەلایەن سەرکردەکانی وڵاتانی عەرەبییەوە لە میانی لووتکەی عەرەبی لە بەغدا.