شاندێکی باڵای ئەمنی عێراق گەیشتە هەولێر؛ لێکۆڵینەوە لە هێرشە درۆنییەکان دەکات

ئاڤا نیوز

لەسەر داوای سەرۆکوەزیرانی عێراق، شاندێکی باڵای ئەمنی بە سەرۆکایەتی قاسم ئەعرەجی، ڕاوێژکاری ئاسایشی نەتەوەیی عێراق گەیشتە شاری هەولێر و بە مەبەستی بەدواداچوون بۆ دۆخی ئەمنی و هێرشە درۆنییەکان بۆسەر دامەزراوە نەوتییەکانی هەرێمی کوردستان.

چیرۆکی سەرەکی: بەیانی ڕۆژی دووشەممە 2025-7-28، شاندێکی باڵای ئەمنی بەسەرۆکایەتی قاسم ئەعرەجی، ڕاوێژکاری ئاسایشی نەتەوەیی عێراق و ئەندامیەتی هەریەک لە فەریق قەیس محەممەداوی، جێگری فەرماندەی ئۆپەراسیۆنە هاوبەشەکان، یاسر حوسێن عیساوی، جێگری سەرۆک ئەرکانی دەستەی حەشدی شەعبی، بریکاری دەزگای هەواڵگری، بریکاری دەزگای ئاسایشی نیشتمانی و بەڕێوەبەری بەڕێوەبەرایەتی هەواڵگری دەزگای بەرەنگاربوونەوەی تیرۆر گەیشتە هەولێر.


لێدوانی فەرمی: سەعید جەیاشی، ڕاوێژکاری ستراتیژیی ئاسایشی نەتەوەیی عێراق بە ئاڤا میدیای ڕاگەیاند: هاتنی شاندەکە لەسەر داوای سەرۆکوەزیرانی عێراق بووە بە مەبەستی بەدواداچوون بۆ دۆخی ئەمنی و هێرشە درۆنییەکان بۆسەر دامەزراوە نەوتییەکانی هەرێمی کوردستان.

ئەوەی پێویستە بیزانیت: سەردانی ئەم شاندە باڵایەی عێراق لە کاتێکدایە، بەرەبەیانی ئەمڕۆ دووشەممە 28ـی تەممووزی 2025، کاتژمێر 05:50، درۆنێکی بۆمبڕێژکراو لە ناحیەی ڕزگاری سەر بە قەزای خەباتی پارێزگای هەولێر کەوتە خوارەوە. خۆشبەختانە هیچ زیانێکی گیانیی لێ نەکەوتەوە.