عێراق و ڕووسیا لەسەر سیستمێکی سیاسیی گشتگیر بۆ سووریا هاوڕان

ئاڤا نیوز

وەزیری دەرەوەی عێراق ڕایدەگەیێنێت، عێراق و ڕووسیا دیدگایەکی هاوبەشیان هەیە بۆ داهاتووی سووریا، کە خۆی دەبینێتەوە لە پێویستیی دامەزراندنی سیستمێکی سیاسی کە "هەموو ڕۆڵەکانی گەلی سووریا بەبێ جیاوازی" لەخۆبگرێت.

 

چیرۆکی سەرەکی: لە پەراوێزی کارەکانی کۆنفرانسی نێودەوڵەتیی نەتەوەیەکگرتووەکان تایبەت بە پرسی فەلەستین، فوئاد حوسێن، جێگری سەرۆکوەزیران و وەزیری دەرەوەی عێراق لەگەڵ سێرگی ڤێرشینین، جێگری وەزیری دەرەوەی ڕووسیا کۆبووەوە.

 

ڕاگەیێنراوی فەرمی: بەگوێرەی ڕاگەیێنراوی وەزارەتی دەرەوەی عێراق، هەردوولا بە وردی دوا پێشهاتەکانی دۆخی سووریایان تاوتوێ کرد و جەختیان لەسەر گرنگیی دۆزینەوەی چارەسەری ئاشتیانە و گشتگیر کردووەتەوە کە یەکپارچەیی و سەقامگیریی خاکی سووریا بپارێزێت.

 

لەهەمان کاتدا: خاڵی سەرەکیی گفتوگۆکان، بریتی بووە لە "مسۆگەرکردنی بەشداریی هەموو پێکهاتەکانی سووریا لە داڕشتنەوەی داهاتووی سیاسیی وڵاتەکەیاندا."

 

- دیدگای هاوبەشی نێوان بەغدا و مۆسکۆ بەگوێرەی ڕاگەیێنراوەکە، لەسەر پێویستیی گەڕاندنەوەی سەقامگیری بۆ سووریا و پێکهێنانی سیستمێکی سیاسییە کە هەموو ڕۆڵەکانی گەلی سووریا بەبێ هیچ جیاوازی و دوورخستنەوەیەک بەشداریی تێدا بکەن.