ئاڤا بەدواداچوون بۆ داواکارییەکی پێشکەشکارانی سەنتەری زمان دەکات

ئاڤا نیوز

دەربارەی بڕی پارەی کۆرسەکانی خوێندن و وەرگرتنەوەی بڕوانامە لە سەنتەری زمانی زانکۆکانی هەرێمی کوردستان، ئاڤا میدیا بەدواداچوون بۆ داواکارییەکی پێشکەشکاران دەکات.

چیرۆکی سەرەکی: ژمارەیەک لە پێشکەشکارانی سەنتەری زمان لە زانکۆکانی هەرێمی کوردستان، داوایان لە ئاڤامیدیا کرد بەدواداچوون بۆ وەرگرتنی بڕی پارەی بەشداری خول و وەرگرتنەوەی بڕوانامە بکات و دەڵێن بە دوو پسوولەی جیا 75 هەزار دینار و 10 هەزار دینارمان لێوەرگیراوە.

لێدوانی فەرمی: د. توانا نەجەف، بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا و توێژینەوەی زانستیی بە ئاڤای گوت: وەرگرتنی پێشکەشکاران لە سەنتەرەکانی زمان و بڕی پارە و شێوازی خولەکان و تاقیکردنەوە هەمووی بە ڕێنمایی ڕێکخراوە و لە وەزارەت پەسەند کراوە، هەموو ئەو ڕێنماییانە بەردەستە و پێشکەشکاران پێش بەشداریکردنیان دەتوانن وەریبگرن.

لەلایەکی دیکەوە: د. شاخەوان سدیق، بەڕێوەبەری سەنتەری زمان لە زانکۆی سەڵاحەددین بە ئاڤای گوت: هەر قوتابیەک بەشداری سەنتەری زمان بکات 150 هەزار دیناری لێوەردەگیرێت، کاتێکیش بڕوانامەی پێدەدرێت 10 هەزار دیناری لێوەردەگیرێت.

- کاتێک پێشکەشکارێک لە تاقیکردنەوەی دیاریکردنی ئاست لە ئاستی سێیەم نمرەی بەرزتر دەهێنێت و نمرەکەی لە ئاستی چوارەم بێت، ئەو پێشکەشکارە بەشداری ئاستی سێیەم ناکات، لە بەرامبەردا لە بری 150 هەزار دینار تەنیا 75 هەزار دیناری خولەکە و 10 هەزار دیناری بڕوانامەی لێوەردەگیرێت، لە کاتێکدا پێشووتر دەبووایە بەشداری ئاستەکانی بکردبا و تەواوی پارەشی لێوەردەگیرا.