ژمارەی کوژراوانی غەززە 60 هەزار کەسی تێپەڕاند

ئاڤا نیوز

 

سەرەرای هەوڵە نێودەوڵەتییەکان بۆ ئاگربەست، تادێت دۆخی کەرتی غەززە خراپتر دەبێت و سەرچاوە پزیشکییەکان لە نوێترین ئاماردا دەڵێن، لە سەرەتای جەنگی غەززەوە 60 هەزار و 34 کەس کوژراون.

 

وێنە گەورەکە: ماوەی 22 مانگە هێرشەکانی ئیسرائیل بۆ سەر کەرتی غەززە بەردەوامە و بەهۆیەوە دەیان هەزار کەس کوژراون و برینداربوون، لە ئێستادا جگە لە بۆردومانکردن ئیسرائیل سیاسەتێکی نوێ بەرامبەر بە خەڵکی غەززە پەیڕەو دەکات: ئەویش سیاسەتی برسیکردنە و دەیان کەس بەهۆیەوە گیانیان لەدەست داوە.

 

بڵاوکراوەی فەرمی: وەزارەتی تەندروستی لە غەززە ڕایگەیاند، ژمارەی کوژراوانی بۆردومانەکانی ئیسرائیل لە 7ـی ئۆکتۆبەری ساڵی 2023، بۆ 60 هەزار و 34 کەس بەرزبووەوە و 145 هەزار و 870 کەسی دیکەش برینداربوون کە برینی زۆربەیان سەختە و بەشێکی ئەندامانی جەستەیان لەدەست داوە.

 

ئەمەش بزانە: هەر بە گوێرەی وەزارەتەکە، لە %55  کوژراو بریندارەکانی کەرتی غەززە ژن و منداڵن، هاوکات 147 کەس بەهۆی نەبوونی خۆراک و برسییەتیەوە مردوون.