کوردستان نیگەرانی و ناڕەزایەتی خۆی لە بەرامبەر ڕاپۆرتی هەژاری لەلایەن بەغداوە دەردەبڕێت

ئاڤا نیوز

وەزارەتی پلاندانانی حکومەتی هەرێمی کوردستان نیگەرانی و ناڕەزایەتیی خۆی بەرامبەر ئەو ڕاپۆرتەی "هەژاریی فرەڕەهەند" دەربڕی کە ئەمڕۆ لە بەغدا لەلایەن وەزارەتی پلاندانانی فیدراڵییەوە بڵاو کرایەوە. وەزارەتی پلاندانانی هەرێم جەخت دەکاتەوە کە ڕاپۆرتەکە بەبێ ئاگاداری و بەشداریی ئەوان ئامادە کراوە و پێیوایە دەبوو لە قۆناغەکانی سەرەتاوە وەک هاوبەشێکی سەرەکی لە پرۆسەکەدا بەشدار بوونایە.

 

چیرۆکی سەرەکی: دوای ئەوەی ئەمڕۆ چوارشەممە 2025-7-30، وەزارەتی پلاندانانی حکومەتی فیدراڵ لە کۆنفرانسێکی ڕۆژنامەوانیدا لە بەغدا، ڕاپۆرتی "هەژاریی فرەڕەهەند MPI"ی ڕاگەیاند، وەزارەتی پلاندانانی هەرێمی کوردستان لە ڕاگەیەندراوێکدا ڕەخنەی لە میکانیزمی ئامادەکردن و بڵاوکردنەوەی ڕاپۆرتەکە گرت.

 

ڕاگەیێنراوی فەرمی: بەگوێرەی ڕاگەیێنراوی وەزارەتی پلاندانانی حکومەتی هەرێمی کوردستان، "ئەم ڕاپۆرتە بەبێ ئاگاداریی ئێمە و دەستەی ئاماری هەرێمی کوردستان ڕێکخراوە، لە کاتێکدا دەبوو لە سەرەتاوە بە هاوبەشی کار لەسەر وردەکارییەکانی بکرایە تاکو ڕا و بۆچوونی حکومەتی هەرێم تێدا جێگیر بکرابا."

 

لەهەمان کاتدا: وەزارەتی پلاندانانی هەرێمی کوردستان ئەوەشی خستووەتەڕوو کە "پێویست بوو دوا ڕەشنووسی ڕاپۆرتەکەیان بەدەست بگات بەمەبەستی پەسەندکردنی ئەنجامەکان و ئامادەبوون بۆ بەشداریکردن لە ڕێوڕەسمی ڕاگەیاندنەکەیدا، بۆ ئەوەی دواتر بتوانرێت سوود لە دەرەنجامەکانی وەربگیرێت.

 

ئەوەی پێویستە بیزانیت: ڕاپۆرتەکەی وەزارەتی پلاندانانی فیدراڵی، کە بە هاوکاریی پرۆگرامی نەتەوەیەکگرتووەکان بۆ پەرەپێدان (UNDP) ئامادە کراوە، پشتی بە داتاکانی دوا ڕووپێوی "ئابووری و کۆمەڵایەتیی خێزان" بۆ ساڵانی (2023-2024) بەستووە کە ئەنجامەکانی لە (26ی شوباتی 2025) ڕاگەیەنرابوو. بەپێی ئەو ڕووپێوییە، ڕێژەی هەژاریی ماددی لەسەر ئاستی عێراق 19.3% و لە هەرێمی کوردستان 8.6% بووە.