سەدان جادوو و نووشتە لە هەولێر دەستی بەسەردا دەگیرێت

ئاڤا نیوز

ژمارەیەکی زۆر لە سحر و جادوو و نووشتە و جۆرەکانی تر لەلایەن لیژنەکانی قایمقامیەتی هەولێر بە هاوکاری ئەوقافی هەولێر لە بازگەکانی هەولێر دەستی بەسەردادەگیرێت.

وێنە گەورەکە: بەشێك لە هاووڵاتیان بۆ گەیشتن بە مەرامەکانیان پەنا دەبەنەبەر نووشتە و جادوو و سحر، ئەمەش پێچەوانەی ئایین و یاسایە، هەر کەسێک ئەم کارە بکات سزای یاسایی دەدرێت.

لێدوانی فەرمی: نەبەز ئیسماعیل، بەڕێوەبەری ئەوقافی هەولێر، بە ئاڤا میدیای ڕاگەیاند، بە تووندترین شێوە ڕووبەڕووی ئەو کەسانە دەبنەوە کە بە ناوی مەلا و شێخ و جادووگەر، نووشتە و جادوو دەکەن، ئەو کارە کاریگەرییەکی زۆری نەرێنی لەسەر کۆمەڵگە هەبووە، زیاتر لە 300 نووشتە و جادوو و سحر و جۆرەکانی دیکەی فێڵکردنمان دەستبەسەرداگرتووە، لەلایەن کەسانی شارەزا لەناو دەبرێن.

زانیاریی زیاتر: بەڕێوەبەری ئەوقافی هەولێر دەڵێت، نزیکەی 21 کەس لە هەولێر لێکۆلینەوەیان لەگەڵ کراوە، کە بەشێکیان کوردن و بەشێکیان عەرەبن لە شاری هەولێر نیشتەجێن، ڕووبەڕووی یاسا کراونەتەوە.

ئەمەش بزانە: بەپێی ڕێنمایی وەزارەتی ئەوقاف و کاروباری ئایینیی حكومه‌تی هه‌رێمی كوردستان ژمارە (1) ساڵی 2023، ئەم کارانە دەچنە خانەی فێڵکردن سزای یاساییان لەسەرە، وەک، بەکارھێنانی دەستەواژەی شێخ، مەلا، قەشە، بانگخواز، پزیشکی ئایینی و ھاوشێوەکانی؛ نووشتە، جادوو و دەرکردنی جنۆکە؛ فرۆشتنی گیادەرمان، خۆراک، خواردنەوە، گوڵاو، ھەنگوین، ڕەشکە و شتی دیكه‌ی بەناوی چارەی پزیشکی ئایینی.