لە غەززە حەوت کەسی دیکە بەھۆی برسییەتییەوە گیانیان لەدەستدا

ئاڤا نیوز

بەهۆی بەردەوامی گەمارۆکانی ئیسرائیل بۆ سەر خەڵکی غەززە، لە ماوەی 24 کاتژمێری ڕابردوودا، حەوت کەسی دیکە لەو کەرتە بەهۆی برسێتییەوە گیانیان لەدەستدا.

چیرۆکی سەرەکی: ماوەی چەند ڕۆژێکە دیمەنی برسێتی و ئازارەکانی خەڵکی غەززە میدیا جیهانییەکانی تەنیوە، سەرەڕای ئەوەی لەم چەند ڕۆژە دەروازەی ڕەفەح کرایەوە و بە سەدان بارهەڵگری هاوکاری خۆراک بۆ غەززە نێردراون، بەڵام هێشتا منداڵانی غەززە بەهۆی برسێتییەوە دەمرن و بە سەختی دەستییان بە خۆراک دەگات.

ڕاگەیێنراوی فەرمی: لە ڕاگەیێنراوێکدا وەزارەتی تەندروستیی فەڵەستین لە کەرتی غەززە ڕایگەیاند، لەماوەی 24 کاتژمێری ڕابردوودا، حەوت کەسی دیکە بەھۆی برسییەتییەوە لە کەرتی غەززە، گیانیان لەدەستداوە.

ژمارەکان وادەڵێن: ژمارەی ئەو فەڵەستینییانەی کە لە مانگی تشرینی یەکەمی ساڵی 2023 تا ئێستا بەھۆی برسییەتییەوە لە کەرتی غەززە گیانیان لەدەستداوە، بەرزبووەتەوە بۆ 154 کەس کە 89ـیان منداڵن.