42 ساڵ تێپەڕی؛ برینی ئەنفالی 8 هەزار بارزانی هێشتا ساڕێژ نەبووە

ئاڤا نیوز

ئەمڕۆ، 42 ساڵ بەسەر یەکێک لە تاوانە گەورەکانی ڕژێمی بەعسدا تێدەپەڕێت، کە تێیدا هەشت هەزار پیاو و گەنجی بارزانی لەلایەن حکومەتی عێراقەوە ئەنفال کران. لە کاتێکدا یادی ئەم کارەساتە دەکرێتەوە، هێشتا ڕووفاتی زۆرینەی قوربانییەکان نەدۆزراوەتەوە و کەسوکارەکانیان چاوەڕێی قەرەبووکردنەوەی حکومەتی عێراقن.

وێنە گەورەکە:  31ـی تەممووزی 1983، ڕژێمی بەعس لە هەڵمەتێکی ڕێکخراودا، هەشت هەزار بارزانی لە مێردمنداڵ، گەنج، پیاو و بەساڵاچوو لە کۆمەڵگە زۆرەملێکانی قوشتەپە، بەحرکە، دیانا و هەریر دەستگیر کرد. دواتر بە شێوەیەکی کۆمەڵ ئەوانی بۆ بیابانەکانی باشووری عێراق گواستەوە و لەوێ بە زیندوویی زیندەبەچاڵ کران.

زانیاریی زیاتر: سەرەڕای ئەوەی دادگای باڵای تاوانەکانی عێراق ئەم تاوانەی وەک جینۆساید ناساندووە، بەڵام تاکو ئێستا حکومەتی فیدراڵی هیچ هەنگاوێکی کرداریی بۆ قەرەبووکردنەوەی مادی و مەعنەویی کەسوکاری قوربانییەکان نەناوە. لەم بارەیەوە، وەزارەتی کاروباری شەهیدان و ئەنفالکراوانی هەرێمی کوردستان جەخت دەکاتەوە کە لە هەوڵەکانیان بەردەوامن بۆ بەدەستهێنانی مافی قوربانییان لە بەغدا.

ژمارەکان وادەڵێن: پرۆسەی گەڕاندنەوەی ڕووفاتی قوربانییەکان زۆر بە خاوی بەڕێوەچووە. بەپێی ئامارە فەرمییەکان، تا ئێستا تەنیا ڕووفاتی 696 ئەنفالکراوی بارزانی لە سێ قۆناغی جیاوازدا (ساڵانی 2005، 2014 و 2022) گەڕێندراونەتەوە بۆ کوردستان. ئەم ژمارەیە بەشێکی زۆر کەمی کۆی گشتیی قوربانییەکان پێکدەهێنێت و چارەنووسی هەزارانی دیکە هێشتا نادیارە.

دوای 42 ساڵ، هێشتا بنەماڵەی قوربانیانی ئەنفالی بارزانییەکان چاوەڕێی گەڕانەوەی ڕووفاتی ئازیزانیان و بەدیهاتنی دادپەروەرین.