نێچیرڤان بارزانی: ئەركە لەسەر حكومەتی عێراق كەسوكاری ئەنفالكراوان قەرەبوو بكاتەوە

ئاڤا نیوز

نێچیرڤان بارزانی، سەرۆكی هەرێمی كوردستان لە 42ـەمین ساڵیادی، ئەنفالكردنی هەشت هەزاری بارزانیدا پەیامێكی بڵاوكردەوە و دەڵێت، له‌م ياده‌دا جه‌خت له‌ مافه‌كانى ته‌واوى قوربانييانى ئه‌نفالى بارزانييان و شاڵاوه‌كانى ئه‌نفال و هه‌موو قوربانييانى ڕژێمى پێشوو ده‌كه‌ينه‌وه‌. ئه‌ركى حكومه‌تى عێراقه‌ كه هه‌رچى پێويسته‌ بیكات بۆ به‌ديهاتنى دادپه‌روه‌رى و قه‌ره‌بووكردنه‌وه‌ى كه‌سوكارى قوربانييان.

وێنە گەورەكە: 31ـی تەممووزی 1983، ڕژێمی بەعس لە هەڵمەتێکی ڕێکخراودا، هەشت هەزار بارزانی لە مێردمنداڵ، گەنج، پیاو و بەساڵاچوو لە کۆمەڵگە زۆرەملێکانی قوشتەپە، بەحرکە، دیانا و هەریر دەستگیر کرد. دواتر بە شێوەیەکی کۆمەڵ ئەوانی بۆ بیابانەکانی باشووری عێراق گواستەوە و لەوێ بە زیندوویی زیندەبەچاڵ کران.

پەیامی فەرمی: نێچیرڤان بارزانی، سەرۆكی هەرێمی كوردستان لە پەیامەكەیدا دەڵیت: ئه‌مڕۆ 42 ساڵ به‌سه‌ر تاوانى سامناكى ئه‌نفالكردنى هه‌شت هه‌زار هاووڵاتيى سڤيلى بێتاوانى بارزانيدا تێده‌په‌ڕێت، له‌م ياده‌ خه‌مگينه‌دا، سه‌رمان له‌به‌رده‌م گيانى پاكياندا داده‌نوێنين و به‌وپه‌ڕى ڕێز و وه‌فادارييه‌وه‌ به‌بيريان ده‌هێنينه‌وه‌.

٠ ئه‌نفالكردنى بارزانييان له‌لايه‌ن ڕژێمى ئه‌وساى عێراقه‌وه‌، به‌رده‌واميى زنجيره‌يه‌ك تاوان بوو بۆ شكاندنى ئيراده‌ى گه‌لى كوردستان و قڕكردنى، به‌ڵام له‌به‌رده‌م خۆڕاگرى و كۆڵنه‌دانى كوردستانيياندا شكستى هێنا و بووه‌ په‌ڵه‌يه‌كى ڕه‌ش به‌ نێوچه‌وانى ئه‌نجامده‌رانييه‌وه‌.

٠ دايكان، خوشكان، هاوسه‌ران و خێزانه‌ بارزانييه‌كان دواى ئه‌و كاره‌ساته‌، بە ده‌رده‌سه‌رى و نه‌هامه‌تييه‌كى بێهاوتا ژيان، ناچار بوون به‌رگه‌ى نه‌بوونى و هه‌ژارى و ژيانێكى سه‌خت و دژوار بگرن. ده‌ستى ئه‌و دايكه‌ دڵسۆزانه‌ ماچ ده‌كه‌م كه‌ به‌ خۆشه‌ويستى و دڵسۆزى بۆ گه‌ل و نيشتمان، منداڵه‌كانيان په‌روه‌رده‌ و گه‌وره‌ كرد.

٠ له‌م ياده‌دا جه‌خت له‌ مافه‌كانى ته‌واوى قوربانييانى ئه‌نفالى بارزانييان و شاڵاوه‌كانى ئه‌نفال و هه‌موو قوربانييانى ڕژێمى پێشوو ده‌كه‌ينه‌وه‌. ئه‌ركى حكومه‌تى عێراقه‌ كه هه‌رچى پێويسته‌ بیكات بۆ به‌ديهاتنى دادپه‌روه‌رى و قه‌ره‌بووكردنه‌وه‌ى كه‌سوكارى قوربانييان.

٠ با ڕابردوو و ئازار و تاڵييه‌كانى ببنه‌ په‌ند و وانه‌ و هانده‌ر تا هه‌موو پێكهاته‌كانى عێراق پێكه‌وه‌ به‌ يه‌كترقبووڵكردن و ڕێزله‌يه‌كگرتن و لێبورده‌يى، ئاشتييانه و شكۆمه‌ندانه‌ به‌ ئازادى و سه‌رفرازى بژين و بێ جياوازى وڵات كۆكه‌ره‌وه‌ى هه‌مووان بێت.

٠ سڵاو له‌ يادى ئه‌نفالكراوانى بارزانى و ته‌واوى شه‌هيدانى كوردستان، ڕێز و پێزانين بۆ هه‌موو ئه‌و جوامێرانه‌ى له‌ هه‌ولێر و ناوچه‌كانى، به‌هاناى بارزانييه‌ لێقه‌وماوه‌كانه‌وه‌ چوون و يارمه‌تييان دان.