ئەو شەش گەنجە کوردەی لە لیبیا دەستگیرکرابوون دەگەڕێنرێنەوە هەرێمی کوردستان

ئاڤا نیوز

 

بە هەوڵی ئاڤا میدیا ئەو شەش کوردەی لە لیبیا دەستگیرکراون، شوێنی دەستگیرکردنیان دەستنیشان دەکرێت و لە ڕۆژانی داهاتووشدا دەگەڕێنرێنەوە هەرێمی کوردستان.

 

وێنە گەورەکە: لیبیا بووە بە یەکێک لە ڕێڕەوەکانی گەیشتن بە وڵاتانی ئەورووپا بە ڕێگای نایاسایی، بەشێک لە گەنجانی کوردستان و وڵاتانی دیکەی ناوچەکە بۆ گەیشتن بە کەناراوەکانی ئیتاڵیا ڕێگای ئەو وڵاتە بەکاردەهێنن، بەڵام لەو وڵاتە لەلایەن هێزە ئەمنییەکان دەستگیر دەکرێن و ڕووبەڕووی دۆخی نەخوازراو و ئەشکەنجەدانیش دەبنەوە.

 

چیرۆکی سەرەکی: پێنج گەنجی خەڵکی چوارقوڕنە و گەنجێکی دۆڵی شاورێ لە سنووری قەزای ڕانیە، ڕۆژی دووشەممە 8-7-2025 لە فڕۆکەخانەی هەولێرەوە بەرەو عەممانی ئوردن بەڕێکەوتوون، لەوێشەوە چوونەتە بەنغازی لە لیبیا، ڕۆژی دووشەممە 21-7-2025، ویستویانە لە بەنغازییەوە بڕۆنە تەرابلووس، بەڵام هەر لە بەنغازی دەستگیر کراون.

 

ئەوەی پێویستە بیزانیت: ئاڤا میدیا ناوی سیانی، پاسپۆرت و وێنە، تەنانەت ئەو ژمارەیەی لە بەندیخانەکەوە تەلەفۆنیان بۆ کوردستان کردبوو، گەیاندە فەرمانگەی پەیوەندییەکانی دەرەوەی هەرێمی کوردستان، دواتر ڕاستەوخۆ هەوڵەکان بۆ گەڕاندنەوەیان دەستی پێ کرد.

 

لێدوانی فەرمی: سەلیم پاشا، ڕاوێژکاری پێشکەوتووی فەرمانگەی پەیوەندیییەکانی دەرەوەی حکومەتی هەرێمی کوردستان بە ئاڤای گوت: شوێنی ئەو شەش گەنجەمان دۆزیوەتەوە و ڕێکارەکانی تایبەت بە گەڕانەوەیان ئەنجام دراوە، لە ڕۆژانی داهاتوو دەگەڕێندرێنەوە نێو کەسوکارییان لە هەرێمی کوردستان.

 

سەلیم پاشا دەشڵێت، هەوڵەکانی حکومەتی هەرێمی کوردستان بۆ دۆزینەوە و گەڕاندنەوەی گەنجەکان بەردەوامە، هەروەها سوپاسی ئاڤا میدیا دەکەین کە ناو و زانیاریی تەواوی لەبارەی ئەو شەش گەنجە گەیاندە فەرمانگەی پەیوەندییەکانی دەرەوە.