ئاڤا زانیاریی نوێ لەبارەی دەستگیرکردنی دوو تیکتۆکچی لە هەولێر ئاشکرا دەکات

ئاڤا نیوز

 

گوتەبێژی ئاسایشی هەولێر ڕایدەگەیێنێت، هەردوو تیکتۆکچی (کەیفی زراری) و (ڕێباز مار کاول) لە ڕۆژانی ڕابردوودا دەستگیرکراون و تاوەکو ئێستا ئازاد نەکراون. دەشڵێت، هەڵمەتی دەستگیرکردنی تیکتۆکچییەکان بەردەوام دەبێت.

 

وێنە گەورەکە: چەند ساڵێکە لەلایەن بەڕێوەبەرایەتیی ئاسایشی هەولێرەوە، هەڵمەتێک بۆ ئاگادارکردنەوە و دەستگیرکردنی ئەو کەسانە دەستیپێکردووە کە لە تۆڕە کۆمەڵایەتییەکانەوە هەوڵی تێکدانی شیرازەی کۆمەڵایەتی و خێزانەکان دەدەن.

 

لێدوانی فەرمی: موقەدەم ئەردەڵان، وتەبێژی بەڕێوەبەرایەتیی ئاسایشی هەولێر بە ئاڤا میدیای ڕاگەیاند: هەر کەسێک لە تۆڕە کۆمەڵایەتییەکان کاری نایاسایی بکات و ببێتە هۆی تێکدانی شیرازەی کۆمەڵایەتی، ئێمە ڕێکاری یاسایی بەرامبەر دەگرینەبەر و بە فەرمانی دادوەر دەستگیری دەکەین.

 

موقەدەم ئەردەڵان جەخت دەکاتەوە، کە زۆرینەی ئەو تیکتۆکچییانەی لە سنووری هەولێر چالاکن، ئاگادارکردنەوەیان پێدراوە و بەڵێننامەشیان پێ پڕکراوەتەوە کە ئەگەر کاری نایاسایی بکەن، دەستگیر دەکرێن.

 

لەلایەکی دیکە: بەگوێرەی گوتەبێژەکەی ئاسایش، "ئەو کەسانەی لە تۆڕە کۆمەڵایەتییەکان چالاکن و کاری باشیان کردووە، بە هەمان شێوە بانگمان کردوون و دەستخۆشیمان لێکردوون، پێمان وتوون کە دەتوانن لەسەر کاری خۆیان بەردەوامبن".

 

هاوکات: لەبارەی هەردوو تیکتۆکچی "کەیفی زراری" و "ڕێباز مار کاول" کە دوو تیکتۆکچی سنووری هەولێرن، موقەدەم ئەردەڵان دەڵێت، لە ڕۆژانی ڕابردوودا دەستگیرکراون و تاوەکو ئێستا ئازاد نەکراون.

 

موقەدەم ئەردەڵان، وتەبێژی بەڕێوەبەرایەتیی ئاسایشی هەولێر دڵنیایی دەدات کە "هەڵمەتی دەستگیرکردنی ئەو کەسانەی لە یاسا لادەدەن، بەردەوام دەبێت".