سەرۆک بارزانی و شاندێکی سەربازیی بەریتانیا: دەبێت هێرشە درۆنییەکان بووەستێنرێن

ئاڤا نیوز

 

ئەمڕۆ پێنجشەممە، لە سەلاحەددین، سەرۆک بارزانی پێشوازی لە شاندێکی باڵای سەربازیی بەریتانیا کرد. لە دیدارەکەدا، شاندی میوان بە تووندی ئیدانەی هێرشە درۆنییەکانی سەر هەرێمی کوردستانیان کرد، هاوکات جەخت لەسەر پتەوکردنی هەماهەنگیی ئەمنی نێوان هەردوولا کرایەوە.

ئەوەی پێویستە بیزانیت: شاندە سەربازییەکەی بەریتانیا کە ئیدوارد ئاڵگرن، ڕاوێژکاری باڵای بەرگریی ئەو وڵاتە بۆ کاروباری ڕۆژهەڵاتی ناوەڕاست و باکووری ئەفریقا سەرۆکایەتی دەکرد، نیگەرانیی خۆیان لەبارەی هێرشەکان دەربڕی. ئەوان پاڵپشتیی تەواوی وڵاتەکەیان بۆ پاراستنی ئاسایش و سەقامگیریی هەرێمی کوردستان دووپاتکردەوە و داوایان کرد کە دەستبەجێ ئەو هێرشانە ڕابگیرێن، ئەنجامدەرانیان ئاشکرا بکرێن و ڕووبەڕووی یاسا بکرێنەوە.

لەلایەکی دیکەوە: هاوکات هەر لەو دیدارەدا کە ئەندرو بیزلی، کونسوڵی گشتیی بەریتانیا لە هەرێمی کوردستان ئامادەی بوو، گفتوگۆ لەبارەی دوایین گۆڕانکاری و بارودۆخی سیاسی و ئەمنیی عێراق و ناوچەکە بە گشتی کرا.

هاوکات: پەیوەندییەکانی نێوان حکومەتی هەرێمی کوردستان و حکومەتی فیدراڵی عێراق و دۆخی سیاسیی ناوخۆی هەرێمی کوردستان، تەوەرێکی دیکەی گفتوگۆکانی نێوان سەرۆک بارزانی و شاندە باڵاکەی بەریتانیا بوون.

زانیاریی زیاتر: هەردوولا هاوڕابوون لەسەر گرنگیی پتەوکردنی زیاتری هاوکاری و هەماهەنگیی سەربازی و ئەمنی لەنێوان هێزی پێشمەرگەی کوردستان و سوپای بەریتانیا.