هێرشە درۆنییەکانی سەر هەرێمی كوردستان دەگەیێنرێتە جنێڤ

ئاڤا نیوز

پرسی هێرشی تیرۆرستیی لەڕێگەی درۆنی بۆمبڕێژكراو بۆ سەر ژێرخانی ئابووریی هەرێمی كوردستان، لە بارەگای نەتەوە یەكگرتووەكان لە جنێڤ باس دەكرێت.

چیرۆكی سەرەكی: لە بارەگەی نەتەوە یەكگرتووەكان لە جنێڤ، كۆبوونەوەی سەرۆكی پەرلەمانی وڵاتانی جیهان بەڕێوەچوو، شاندی سەرۆكایەتیی ئەنجوومەنی نوێنەرانی عێراق، لە نێویشیاندا د. شاخەوان عەبدوڵڵا، جێگری سەرۆكی پەرلەمان، لەو كۆبوونەوەیە بەشدار بوو، وتارێكی پێشكەش كرد.

لێدوانی فەرمی: د. شاخەوان عەبدوڵڵا لەمیانی وتارەكەیدا، ئاماژەی بە هێرشی تیرۆریستی بۆ سەر هەرێمی كوردستان دا كە میلیشیاكان بە درۆنی بۆمبڕێژكراو، ژێرخانی ئابووریی هەرێمی كوردستان، بەتایبەتی دامەزراوە نەوتییەكان بەئامانج دەگرن، بەهۆیەوە كاریگەری لەسەر بەرهەمهێنانی سووتەمەنی دروستكرد و زیانی ئابووریی بەدوای خۆیدا هێنا.

جێگری سەرۆكی پەرلەمانی عێراق باسی لەوەشكرد، سەرەڕای هەوڵەكانی حكومەتی فیدراڵ بۆ ئەوەی چەك تەنها بە دەستی دەوڵەتەوە بێت، كەچی تا ئێستا گرووپە چەكدارەكان بوونەتە سەرچاوەی هەڕەشە بۆ سەر ئاسایش و سەقامگیریی ناوخۆیی و ئاشتی كۆمەڵایەتی.