فایلی خەڵک؛ ماوەی چوار ڕۆژە کارەکانی فەرمانگەی کارتی نیشتمانی شەمامک ڕاگیراوە

ئاڤا نیوز

ئاڤا لەسەر داوای ژمارەیەکی زۆر لە هاووڵاتییان بەدواداچوونی بۆ ڕاگرتنی کارەکانی فەرمانگەی کارتی نیشتمانی ناحیەی شەمامک کرد، بەڕێوەبەری ناحیەکەش جگە لە چارەسەری ئەو گرفتە موژدەیەکیش دەدات بە دانیشتوانی ئەو ناوچەیە. 

چیرۆکی سەرەکی: ماوەی چوار ڕۆژە کارەکانی فەرمانگەی کارتی نیشتمانی ناحیەی شەمامک بەهۆی نەبوونی کارەبای نیشتمانییەوە ڕاگیراوە و هیچ مامەڵەیەکی خەڵکی ڕایی ناکەن، هەر بۆیە ئەو کەسانەی لەو فەرمانگەیە کاریان هەبووە پەیوەندییان بە ئاڤاوە کردووە کە دەنگیان بگەیەنن بە لایەنە پەیوەندیدارەکان. 

لێدوانی فەرمی: کاروان عارف، بەڕێوەبەری ئەو ناحیەیە بە ئاڤای ڕاگەیاند: وەستانی کاری ئەو فەرمانگەیە کاتییە و بە هەماهەنگی لەگەڵ بەڕێوەبەرایەتیی ڕەگەزنامە و کاروباری شارستانیی هەولێر کراوە.

ئێستا تیمەکانی پڕۆژەی ڕووناکی لەو سنوورە کار دەکەن و پێوەر دەبەستن، بۆ سەلامەتی گیانی تیمە تەکنیکییەکان کارەبا دەکوژێنرێتەوە، دوای چەند ڕۆژێکی تر کاری تیمەکان تەواو دەبێت و فەرمانگەی کارتی نیشتمانی دەست بە کارکردن دەکاتەوە.


زانیاریی زیاتر: بەڕێوەبەری ناحیەی شەمامک موژدە بە هاووڵاتییان دەدات کە کێشەی کارەبایان بەم زووانە نامێنێت و سەرجەم گرفتەکانیان چارەسەر دەکرێت.