فایلی خەڵک؛ حەوت گوندی سنووری ئامێدی هێڵی مۆبایل و ئینتەرنێتیان نییە

ئاڤا نیوز

دانیشوانی ژمارەیەک گوندی قەزای ئامێدی دوای ڕاگرتنی شەڕی پەکەکە و چەکدارانی سوپای تورکیا، ئێستا ناوچەکەیان ئاوەدان کردووەتەوە و داوای خزمەتگوزاریی ئینتەرنێت و موبایل دەکەن.

چیرۆکی سەرەکی: لە سنووری قەزای ئامێدی حەوت گوند هیچ جۆرە خەتێکی مۆبایل و ئینتەرنێتیان نییە، گوندەکانی، ئورە، سەرەرۆ، ئەدنێ، دێشێش، هدێنە، بناڤیێ و گوندی بێدوهێ، ئەم گوندانە لە سنووری ناحیەی کانی ماسێن. ئەو گوندانە پێشتر بەهۆی شەڕی پەکەکە و تورکیا چۆڵکرابوون، ئێستا دوای وەستانی شەڕ ئاوەدان کراونەتەوە، خەڵکەکە داوای هێڵی مۆبایل و ئینتەرنێت دەکەن.

زانیاریی زیاتر: هەندێک لەو گوندانە هیچ شەبەکەیەکیان نییە، هەندێکیشیان جارجار بەس شەبەکەی تورکیایان هەیە و ئەمەش گرفتی بۆ دروستکردوون.

لێدوانی فەرمی: وارشین سەلمان، قائیقامی قەزای ئامێدی بە ئاڤای ڕاگەیاند: بۆ چارەسەرکردنی کێشەکە لەسەر خەتین و هەوڵ دەدەرێت لە زووترین کاتێکدا چارەسەر بکرێت.