لە ئەنبار ژمارەیەک جادووگەر و سیحرباز دەستگیر دەکرێن

ئاڤا نیوز

لە هەڵمەتێکی ئەمنیی تایبەتدا، پۆلیسی پارێزگای ئەنبار هەشت لە دیارترین  سیحرباز و جادووگەرەکانی پارێزگاکەی دەستگیر کرد.

چیرۆکی سەرەکی: بەڕێوەبەرایەتیی پۆلیسی ئەنبار، هەڵمەتێکی بەرفراوانی لە چەندین ناوچەی جیاوازی پارێزگاکە ئەنجامداوە و ئەو شوێنانەی کردووەتە ئامانج کە کاری جادووگەری و نووشتەکاری تێدا دەکرێت، ئامانج لێی ڕووبەڕووبوونەوەی دیاردەی جادووگەرییە، کە لەم دواییانەدا بەشێوەیەکی بەرچاو پەرەی سەندووە و بووەتە هۆی دروستکردنی کێشەی کۆمەڵایەتی لەنێوان دانیشتووانی پارێزگاکەدا.

لێدوانی فەرمی: عادل حامد ڕەشید، فەرماندەی پۆلیسی پارێزگای ئەنبار، ڕایگەیاند:  تیمێکی لە پۆلیسی ئەنبار، هەڵیانکوتاوەتە سەر ماڵ و جێگای چەند جادووگەر و سیحربازێک و هەشتیان لە کاتی ئەنجامدانی جادوو و نوشتە بە تاوانی ئاشکرا و بەرچاو دەستگیر کرد.

زانیاریی زیاتر: فەرماندەی پۆلیسی پارێزگای ئەنبار، ئاماژەی بەوەشکرد،  تیمە ئەمنییەکە دەستیان بەسەر چەندین موروو، تەزبیح، نوشتە و کەرەستەی دیکەدا گرتووە بۆ کاری سیحر و جادووگەری بەکارهێنراون ، هاوکات دەستگیرکراوەکان ئەم کارەیان کردووەتە پیشە بۆ چەواشەکردنی خەڵکی بەرامبەر بڕە پارەیەک کە هەندێک جار لە ڕادەبەدەربووە.