کێشەی کارەبای ئیدارەی سەربەخۆی سۆران چارەسەر کرا

ئاڤا نیوز

بەڕێوەبەری کارەبای سۆران دەڵێت، ماوەیەک بوو سەنتەری سۆران و گوندەکانی دەورووبەری ڕووبەرڕووی گرفتی کەمی کارەبا هاتبوون، ئەمڕۆ توانرا ئەو کێشەیە چارەسەر بکرێت.

وێنە گەورەکە: ساڵانە لە وەرزی هاوین بە هۆی زیادبوونی خواست لەسەر کارەبا، لە بەشێکی ناوچەکان کارەبای نیشتمانی کەم دەبێتەوە، بۆ چارەسەرکردنی ئەو گرفتە درێژخایەنە، حکومەتی هەرێمی کوردستان پڕۆژەی ڕووناکی ڕاگەیاندووە و پلانەکە ئەوەیە تا 2026 هیچ شوێنێکی کوردستان کێشەی کارەبای نەمێنێ.

لێدوانی فەرمی: ئەردەوان ئیبراهیم، بەڕێوەبەری کارەبای سۆران بە ئاڤا میدیای ڕاگەیاند، ماوەیەک بوو چوار بۆ پێنج کاتژمێر کارەبای نیشتمانی لە ئیدارەی سەربەخۆی سۆران کەمیکردبوو، بەڵام ئەمڕۆ لەسەر ڕاسپاردەی سەرۆک بارزانی و مەسرور بارزانی، سەرۆکوەزیرانی کوردستان، مەلا مستەفا بارزانی سەردانی ئیدارەی سەربەخۆی سۆرانی کرد، توانرا ئەو کێشەیەی هەبوو لەبەردەم کەمبوونەوەی کارەبا چارەسەر بکرێت.

زانیاریی زیاتر: بەڕێوەبەری کارەبای سۆران لەبارەی خشتەی کارەبا دەڵێت: پێشووتر لە کاتژمێر یەکی شەو کارەبای گوندەکان دەبڕا و کارەبا دەدرایەوە سەنتەری شار، تا کاتژمێر 12ـی نیوەڕۆ، دواتر کارەبا دەدرایەوە گوندەکان، ئەم خشتەیە چوار تا پێنج کاتژمێر کەمی کردبوو، بەڵام لە ئەمڕۆوە کارەبا گەڕایەوە دۆخی جارانی.

ژمارەکان وادەڵێن: لە ئیدارەی سەربەخۆی سۆران، 87 هەزار و 200 هاوبەشی کارەبا هەیە، ئەم هاوبەشانە دابەش دەبن بەسەر ماڵ و شوێنی بازرگانی و دامەزراوەکان.