ئێران سوپاسی هەرێمی كوردستان دەكات بۆ میوانداریی زیارەتكارانی چلەی ئیمام حوسێن

ئاڤا نیوز

كونسوڵی گشتیی ئێران لە هەرێمی كوردستان ڕایدەگەیەنێت، هەرێمی كوردستان ئامادەكاری پێویستی كردووە بۆ لەخۆگرتنی زیارەتكارانی مەراسیمی چلەی ئیمام حوسێن، سوپاس و پێزانینی وڵاتەكەی بە كاربەدەستانی هەرێمی كوردستان دەگەیەنێت بۆ دابینكردنی پێداویستییەكانی زیارەتكاران.

وێنە گەورەکە: ساڵانە بەبۆنەی چلەی "شەهیدکردنی" ئیمام حوسێن ملیۆنان زیارەتکاری عێراقی و بیانی سەردانی مەزارگەی ئیمام حوسێن لە شاری کەربەلا و مەزارگەی ئیمامی عەلی لە شاری نەجەف دەکەن، چلەی ماتەمینی ئیمام حوسێن دەکەوێتە ڕۆژی 20ـی سەفەری 1447ـی کۆچی، کە بۆ ئەمساڵ بەپێی هەندێک لێکدانەوەی فەلەکی هاوتای ڕۆژی 12 یان 13ـی ئاب دەبێت.

ئەوەی پێویستە بیزانیت: ساڵانە نزیكەی 150 هەزار كەس لە ڕێگەی مەرزی تەمەرچین و باشماخەوە دێنە هەرێمی كوردستان لەوێشەوە بەرەو كەربەلا و نەجەف گەشت دەكەن، بۆ بەشداریكردن لە مەراسیمەكانی عاشوورا و چلەی ئیمام حوسێن.

لێدوانی فەرمی: فەرامەرز ئەسەدی، كونسوڵی كۆماری ئیسلامی ئێران لە هەرێمی كوردستان ڕایدەگەیەنێت، حكومەتی هەرێمی كوردستان بەوپەڕی توانای خۆیەوە هاوكاری ئێمە و هێزە سنوورییەكانی كردووە و سەرجەم پێداویستییەكانی زیارەتكارانی دابینكردووە، هەر لە گەیشتنیان لە دەروازە سنوورییەكانی هەرێمی كوردستانەوە تا دەگەنە شارەكانی هەرێمی كوردستان و پاشانیش بەوپەڕی ڕێز و خزمەتەوە بەرەو شارەكانی كەربەلا و نەجەف بەڕێیان دەكەن و، ئەو هەڵوێستەی كاربەدەستانی هەرێمی كوردستان، جێگەی سوپاس و پێزانینە.

زانیاریی زیاتر: ئەسەدی ئاماژەی بەوەشكردووە، ماوەی چوار ساڵە هەرێمی كوردستان بە تەواوی هاوكاریمان دەكات بۆ پێشوازی لە زیارەتكارانمان هەر لەو ماوەیەشدا بەوپەڕی توانا بەرپرسانی حكومەتی هەرێمی كوردستان سەرجەم پێداویستییەكانی بۆ زیارەتكاران دابین كردووە لە خێوەتگە و شوێنی حەوانەوەی فراوان تا دەگاتە خواردن، خواردنەوە و پێداویستی پزیشكی، ئەم هاوكارییە جگە لەوەی قەرەباڵغی لە دەروازە سنوورییەكان كەم دەكاتەوە، ئەزموونێكی سەركەوتووە بۆ پتەوكردنی پەیوەندییە دووقۆڵییەكانی نێوان هەرێمی كوردستان و ئێران.