سەرۆکوەزیران مەسرور بارزانی پەیامێک بۆ میری ئێزدییەکان دەنێرێت

ئاڤا نیوز

سەرۆكوەزیران مەسرور بارزانی، بەبۆنەی هاتنی جەژنی چلەی هاوینی ئێزدییەكان، پشتیوانی حكومەتی هەرێمی كوردستانی بۆ ماف و داوا ڕەواكانی پێكهاتەی ئێزدی دووپات کردەوە.

 

چیرۆكی سەرەكی: ئێزدییەكان ساڵانە ژمارەیەك بۆنە و یادی جۆراوجۆریان هەیە و لە بۆنەكاندا؛ ڕێوڕەسم و پەرستشی تایبەت بە خۆیان دەگێڕن، جەژنی چلەی هاوینیش جەژنێكی تایبەت بە ئێزدییەكانە كە سێ ڕۆژ دەخایەنێت و تێیدا ئێزدییەكان بەڕۆژوو دەبن. مێژوونووسان بۆچوونیان وایە، ئەو هۆكارەی وای كردووە بیروباوەڕی ئێزدی بە درێژایی مێژوو بەردەوام بێت، بەردەوامی ئەو ڕێوڕەسمانە كە بە درێژایی ساڵ ئەنجامی دەدەن.

 

پەیامی فەرمی: سەرۆکوەیران مەسرور بارزانی لە پەیامەكەیدا، پیرۆزبایی ئاڕاستەی ئێزدییان لە کوردستان و جیهان کرد و تێیدا پشتیوانیی حکومەتی هەرێمی کوردستانی بۆ ماف و داوا ڕەواکانیان دووپات کردەوە.

 

دەقی پەیامەكەی سەرۆکوەزیران مەسرور بارزانی:

 

"جەژنی چلەی هاوین لە تەواوی خوشک و برا ئێزدییەکانی کوردستان و جیهان و بەڕێزان میری ئێزدییان و بابە شێخ و ئەنجوومەنی ڕۆحانی پیرۆز دەکەم. هیوادارم بە خێر و خۆشی ڕۆژانی جەژن بەسەر بەرن. هیوای داهاتوویەکی باشتر بۆ خوشک و برا ئێزدییەکان دەخوازم و پشتیوانیی حکومەتی هەرێمی کوردستان بۆ ماف و داوا ڕەواکانیان دووپات دەکەینەوە. هەمیشە لە خۆشیدا بن."