حەماس تۆمەتەکانی ترەمپ سەبارەت بە دزینی هاوکارییە مرۆییەکان ڕەت دەکاتەوە

ئاڤا نیوز

 

بزووتنەوەی حەماس وەڵامی تۆمەتەکانی سەرۆکی ئەمریکا سەبارەت بە دزینی هاوکارییە مرۆییەکانی غەززە دەداتەوە و دەڵێت، "دۆناڵد ترەمپ هەرگیز لە دووبارەکردنەوەی تۆمەتەکانی ئیسرائیل سەبارەت بە دزینی هاوکارییەکان ماندوو نابێت."

 

وێنە گەورەکە: ڕۆژی چوارشەممە، 30-7-2025، دۆناڵد ترەمپ، سەرۆکی ئەمریکا بزووتنەوەی حەماسی بە دزینی هاوکارییە مرۆییەکانی کەرتی غەززە تۆمەتبار کرد و ڕایگەیاند، '' ئێمە پارەیەکی زۆر بە پێداویستی تەندروستی دەدەین، هیوادارین  بە شێوەیەکی دادپەروەرانە لە ناوچەکەدا دابەش بکرێت، بەڵام ئەو پێداویستیانەی لەلایەن وڵاتانی دیکەوە دەنێردرێن لەلایەن حەماسەوە دەدزرێن."

 

بڵاوکراوەی فەرمی: بزووتنەوەی حەماس لە بەیاننامەیەکدا ڕایگەیاند، سەرۆکی ئەمریکا هەرگیز لە دووبارەکردنەوەی تۆمەتەکانی ئیسرائیل سەبارەت بە دزینی هاوکارییەکان ماندوو نابێت، حەماسیش هەرگیز ماندوو نابێت لە ڕەتکردنەوەی ئەو تۆمەتانە.

بزووتنەوەکە دەشڵێت، "ئەو برسێتی و جینۆسایدەی کە لە غەززە ڕوودەدات، دەرئەنجامی ڕاستەوخۆی سیاسەتی داگیرکاریی ئیسرائیلە کە لەلایەن ئەمریکاوە پاڵپشتی دەکرێت". هاوکات داوای لە واشنتن کرد گەمارۆ و سیاسەتی برسیکردن ئیدانە بکات و لایەنگری بۆ ئیسرائیل بوەستێنێت.

 

ئەوەی پێویستە بیزایت: ئیسرائیل ماوەی چەند مانگێکە گەمارۆی دەروازەکانی کەرتی غەززەی داوە بە بیانووی دزینی هاوکارییە مرۆییەکان لەلایەن حەماسەوە. ئەمەش بووەتە هۆی ئەوەی دەیان کەس لە کەرتەکە بەهۆی برسیێتییەوە گیان لەدەست بدەن.