لیستی مووچەی مانگی حەوت ڕەوانەی بەغدا کرا

ئاڤا نیوز

وەزارەتی دارایی و ئابووریی هەرێمی کوردستان، لیستی مووچەی مانگی حەوتی ڕادەستی وەزارەتی دارایی عێراق کرد، ئەمە لەکاتێکدا هێشتا بەغدا بڕیاری خەرجکردنی مووچەی مانگی شەشی مووچەخۆرانی هەرێمی کوردستانی نەداوە.

 

وێنە گەورەکە: تاوەکوو ئێستا بەغدا پارەی مووچەی مانگی شەشی خەرج نەکردووە، بەڵام حکومەتی هەرێمی کوردستان بەردەوامە لە جێبەجێکردنی پابەندییەکانی، ئێستا لیستی مووچەی مانگی شەش  و حەوتی ڕادەستکردووە و لەگەڵ تەرازووی پێداچوونەوەی مانگی شەش.

 

ڕاگەیێنراوی فەرمی: وەزارەتی دارایی و ئابووری لە ڕاگەیێنراوێکدا ئاماژە بەوەدەدات، کە لەلایەن تیمی تەکنیکی وەزارەتی دارایی و ئابووریی هەرێمی کوردستانەوە لیستی مووچەی مانگی حەوت ڕادەستی فەرمانگەی ژمێریاری وەزارەتی دارایی حکومەتی فیدراڵ کرا.      

         

هەنگاوی داهاتوو: وەزارەتی دارایی داهاتی نانەوتی مانگی شەش کە 120 ملیار دینارە، ئامادەی کردووە و بڕیارە لە چەند ڕۆژی داهاتوو بخرێتە سەر هەژماری بانکی وەزارەتی دارایی عێراق.