ماوەی نوێکردنەوەی پسووڵەی خۆراک درێژکرایەوە

ئاڤا نیوز

 

بەڕێوەبەری گشتیی بازرگانی دەڵێت، دوای گفتوگۆیەکی چڕ لەگەڵ وەزارەتی بازرگانیی عێراق، ڕەزامەندی لەسەر درێژکردنەوەی ماوەی خۆتۆمارکردن و نوێکردنەوەی پسووڵەی خۆراک بە شێوازی ئەلیکترۆنی تا ڕێکەوتی 25ی ئابی 2025 وەرگیراوە، پرۆسەکە بێ بەرامبەرە و ئەمە دوا مۆڵەتە بۆ هاوڵاتیان.

 

لێدوانی فەرمی: نەوزاد شێخ کامل، بەڕێوەبەری گشتیی بازرگانی لە وەزارەتی بازرگانی و پیشەسازیی هەرێمی کوردستان ڕایگەیاند، کە ڕێژەی بەشداری لە پرۆسەی نوێکردنەوەی پسووڵەی خۆراک لە سەر ئاستی هەرێمی کوردستان گەیشتووەتە 87%. ئەمەش بەشێوەیەکە کە لە پارێزگای هەڵەبجە ڕێژەکە 88%ی تێپەڕاندووە، لە سلێمانی زیاتر لە 87% بووە، لە هەولێر 84%ی تێپەڕاندووە و لە دهۆکیش گەیشتووەتە 79%.

 

ئەوەی پێویستە بیزانیت: بەپێی ئامارەکان، پارێزگاکانی هەرێمی کوردستان بە ڕێژەیەکی بەرچاو زیاتر لە پارێزگاکانی دیکەی عێراق بەشدارییان لەم پرۆسەیەدا کردووە

هۆشداری دەدرێت: نەوزاد شێخ کامل جەختی لەوە کردەوە کە ئەمە دوا دەرفەتە بۆ ئەو هاوڵاتیانەی کە تا ئێستا خۆیان تۆمار نەکردووە. داوای لێکردن کە لەم ماوەیەدا هەر گرفتێکیان هەبووە چارەسەری بکەن و فۆڕمی ئەلیکترۆنی پڕ بکەنەوە.

ناوبراو هۆشداری دا کە هەر هاوڵاتییەک پابەند نەبێت و خۆی تۆمار نەکات، بەشە خۆراکی مانگانەی ڕادەگیرێت تا ئەو کاتەی فۆڕمەکە پڕ دەکاتەوە. هەروەها ئاشکرای کرد کە دوای ئەم وادەیە، ڕێکاری دیکە بۆ قۆناغی دووەمی پرۆسەکە دەگیرێتەبەر.