سەرۆك بارزانی: پشتیوانییەکانی ئیتاڵیا بۆ هەرێمی کوردستان لەبیر ناکەین

ئاڤا نیوز

لە سەڵاحەددین، سەرۆک بارزانی پێشوازی كونسوڵی گشتیی ئیتاڵیا لە هەولێر كرد و هەردوولا جەختیان لە پەرەپێدانی پەیوەندیی دۆستانەی نێوان گەلی کوردستان و گەلی ئیتاڵیا کردەوە. هەروەها سەرۆک بارزانی ڕایگەیاند،  هەرێمی کوردستان پشتیوانییەکانی ئیتاڵیا لەبیر ناکات.

ڕاگەیێنراوی فەرمی: بارەگای بارزانی ڕایگەیاند: ڕۆژی یەکشەممە 3ـی ئاب، سەرۆک بارزانی لە سەڵاحەددین پێشوازی لە تۆماسۆ سانسۆنی، كونسوڵی گشتیی ئیتاڵیا لە هەولێر كرد، لە دیدارەکەدا سەرۆک بارزانی ئاماژەی بەوەدا کە هەرێمی کوردستان بە بایەخەوە لە پەیوەندییەکانی لەگەڵ ئیتاڵیا دەڕوانێت و  پشتیوانییەکانی ئیتاڵیا بۆ هەرێمی کوردستان لەبیر ناکات.

لای خۆیەوە کونسوڵی گشتیی ئیتاڵیا جەختی لە پشتیوانییەکانی حکومەت و گەلی ئیتاڵیا بۆ هەرێمی کوردستان و پەرەپێدانی پەیوەندییەکانی نێوان هەرێمی کوردستان و ئیتاڵیا لە بوارە جیا جیاکاندا کردەوە.

هەر لە دیدارەكەدا بیروڕا لەبارەی دوایین پێشهات و ئاڵنگارییەکان پەیوەست بە پرۆسەی ئاشتی لە تورکیا و ئاڵۆزییەکانی سووریا خرایە ڕوو، هەروەها جەخت لە پەرەپێدانی پەیوەندیی دۆستانەی نێوان گەلی کوردستان و گەلی ئیتاڵیا كرایەوە.