دیندار زێباری: تا ئێستاش نزیكەی 300 هەزار ئێزدی ئاوارەن

ئاڤا نیوز

سەرەڕای تێپەڕبوونی یازدە ساڵ بەسەر جینۆسایدی كوردانی ئێزدی، تا ئێستاش زیاتر لە 290 هەزار ئێزدی لە هەرێمی كوردستان ئاوارەن، ڕێكخەری ڕاسپاردە نێودەوڵەتییەكانیش دەڵێت، هۆكاری نەگەڕانەوەی سەدان هەزار ئاوارەی ئێزدی بۆ زێدی خۆیان، ناسەقامگیری دەڤەری شنگال و نەبوونی خزمەتگوزاری و بوونی هێزی نایاساییە.

چیرۆكی سەرەكی: ئەمڕۆ 11 ساڵ بەسەر ڕووداوی كارەساتباری كۆمەڵكوژیی ئێزدییەكانی دەڤەری شنگال تێپەڕدەبێت كە جگە لە كوژران و ڕفاندنی هەزاران كەس، دەیان هەزاری دیكەشیان ئاوارەی هەرێمی كوردستان و وڵاتانی ئیقلیمی بوون.

لێدوانی فەرمی: د. دیندار زێباری، ڕێکخەری ڕاسپاردە نێودەوڵەتییەکان ڕایگەیاند: دوای 11 ساڵ لەم کارەساتە تا ئێستا شنگال و دەوروبەری ئاوەدان نەکراوەتەوە و دانیشتووانی بە هۆی ناسەقامگیریی ناوچەکە و نەبوونی خزمەتگوزارییە پێویستەکان و بوونی هێزی نایاسایی، ناتوانن بگەڕێنەوە.

زانیاریی زیاتر: بەپێی زانیاریی ڕێکخەری راسپاردە نێودەوڵەتییەکانی حكومەتی هەرێمی كوردستان، دوای هێرشەکانی تیرۆریستانى داعش، هەرێمی کوردستان میوانداری زیاتر لە دوو ملیۆن پەنابەر و ئاوارەی ناوخۆیی کرد کە بەشێکی زۆریان کوردانی ئێزدی بوون، بەگوێرەی ئامارەکانی ڕزگارکردنی ڕفێندراوان تا ئێستا زیاتر لە 290 هەزار ئێزدی لە هەرێمی کوردستان ئاوارەن، لەوانەش 120 هەزاریان لەنێو كەمپەكان و 170 هەزاریش لە دەرەوەی كەمپەكان دەژین.