حكومه‌تی هه‌رێمی كوردستان قەرزی بازرگانان وەردەگرێتەوە

ئاڤا نیوز

 

ئەنجوومەنی وەزیرانی هەرێمی کوردستان لە کۆبوونەوەی ئەمڕۆدا پرسی وەرگرتنەوەی قەرزە بازرگانییەکان تاوتوێ دەکات. 

 

وێنە گەورەکە: ئەنجوومەنی وەزیران ئەمڕۆ چوارشەممە بەسەرۆکایەتیی سەرۆکوەزیران بارزانی لەبارەی چەند بابەتێک کۆدەبێتەوە، یەکێک لە تەوەرەکانی تایبەت دەبێت بە جێبەجێكردنی ماددەی 13 لە یاسای چاكسازی، کە وەزارەتی دارایی پابەند دەکات بە وەرگرتنەوەی قەرزە بازرگانییەكان.

 

ئەوەی پێویستە بیزانیت: نزیكه‌ی پێنج تریلیۆن دینار لە قه‌زری حکومەت لای خه‌ڵك و بازرگانه‌كانی هەرێمی کوردستانە، تاوەکو ئێستاش تەنیا بە جێبەجێکردنی یاسای چاکسازی نزیکەی دوو تریلیۆن دینار گەڕێنراوەتەوە خەزێنەی گشتی.

 

زانیاریی فەرمی: بەگوێرەی ڕاپۆرتی فەرمانگەی هەماهەنگی و بەدواداچوون، كۆی گشتیی قه‌رزه‌ بازرگانییه‌كان‌ 408 ملیار و 470 ملیۆن و 119 هه‌زار دیناره‌، به‌ سووی كه‌ڵه‌بووی بانكییه‌وه‌ ده‌بێته یه‌ك تریلیۆن و 36 ملیار و 504 ملیۆن و 669 هه‌زار دینار؛ له‌م پاره‌یه‌ به‌ جێبه‌جێكردنی مادده‌ی 13 یاسای چاكسازی بڕی 138 ملیار و 627 ملیۆن 489 هه‌زار دینار وەرگیراوەتەوە.

 

ئەمەش بزانە: کۆی گشتیی قه‌رزی بانكه‌ پسپۆڕییه‌كان پێنج تریلیۆن و 58 ملیار و 953 ملیۆن و 686 هه‌زار و 350 دینارە، له‌م پاره‌یه‌ به‌ جێبه‌جێكردنی هەمان یاسا بڕی یه‌ك تریلیۆن و 933 ملیار و 504 ملیۆن و 694 هه‌زار و 936 دینار وەرگیراوەتەوە.