حکومەتی کوردستان ڕێگری لە هاتنی لیژنەیەکی بەدواداچوونی وەزارەتی دارایی عێراق دەکات

ئاڤا نیوز

بڕیار بوو ئەمڕۆ یەکشەممە، چوار لیژنەی هاوبەشی نێوان حکومەتی کوردستان و حکومەتی عێراق، ڕاپۆرتی کۆتایی خۆیان لەبارەی پرسی نەوت، داهاتی ناوخۆ، بودجە و میکانیزمی بە بانکیکردنی مووچە ئامادە بکەن و پێشکەش بە لیژنەی باڵای وەزاری عێراق بکەن دواتر لە کۆبوونەوەی ئەنجوومەنی وەزیرانی عێراق بڕیاری کۆتاییان لەسەر بدرێت، بەڵام تا ئێستا هیچ ئەنجامێکی فەرمی ڕانەگەیەنراوە.

وێنە گەورەکە: مووچەخۆرانی هەرێمی کوردستان چاوەڕوانی چارەسەرێکی بنەڕەتین بۆ کێشەی مووچەکانیان، بەڵام کێشەکانی نێوان هەولێر و بەغدا وای کردووە کە داهاتووی پەیوەندییەکان و چارەسەری کێشە داراییەکان بکەوێتە بەردەم مەترسییەوە.

لەلایەکی دیکەوە: ناکۆکییەکان قووڵتر بوونەتەوە دوای ئەوەی حکومەتی عێراق بڕیاری دا لیژنەیەکی دیوانی چاودێریی دارایی خۆی ڕەوانەی هەرێم کرد بۆ وردبینیکردن لە سەرجەم داهات و خەرجییەکان. بەڵام وەزارەتی دارایی هەرێمی کوردستان ئامادە نەبوو پێشوازی لە لیژنەکە بکات و پێی ڕاگەیاندوون کە "بەهۆی نەناردنی مووچەی دوو مانگی ڕابردوو، هیچ پاساوێک بۆ وردبینی لە ئێستادا نییە."

کاریگەریی و لێکەوتەکان: دوابەدوای ئەم هەڵوێستەی هەرێمی کوردستان، لیژنەکەی دیوانی چاودێریی دارایی لە کۆتایی هەفتەی ڕابردوودا ڕاپۆرتێکیان بۆ محەممەد شیاع سوودانی بەرز کردووەتەوە و تێیدا ئاماژەیان بەوە داوە کە "حکومەتی هەرێمی کوردستان هاوکار و هەماهەنگ نییە."

لێدوانی فەرمی: بەرپرسێکی کورد لە حکومەتی عێراق بە ئاڤای ڕایگەیاند: "چارەسەری کێشەکە پێویستی بە دەستوەردان و گوشاری سیاسیی ئاستی باڵا هەیە، ئەگەرنا بەغدا جارێکی دیکەش کێشە بۆ ناردنی مووچە دروست دەکاتەوە."