شێخ جەعفەر لە یەکێتی نیگەرانە و هۆشداری بە بەرپرسانی حیزبەکە دەدات

ئاڤا نیوز

شێخ جەعفەر لە شێوازی ئیدارەدانی یەکێتی نیگەرانە و پەیامێکی هۆشداری بۆ بەرپرسانی باڵای یەکێتی ناردووە، دەڵێت ئەم دۆخە قبووڵ ناکات تەنیا پۆستی تەشریفاتی هەبێت.

زانیاریی تایبەت: ئاڤا زانیویەتی، لەمدوایانە شێخ جەعفەر لە ئیدارەدانی یەکێتی نیگەرانە، لای هاوڕێکانی وتوویەتی، "چیتر ئەم وەزعە قبووڵ ناکەم بەشێک نەبم لە بڕیاردان و ئاگاداری کارگێڕی و دۆخی دارایی حیزب نەبم، دەبێت پۆستەکەم بەکردار دەسەڵاتی هەبێت".

گوتووشیەتی، "دەبێت لە دابەشکردنی پۆستەکانی یەکێتی لە کابینەی دەیەمی حکومەتی کوردستان ئاگادار بم، مەعقول نییە من بەرپرسی ئەنجوومەنی پاراستنی بەرژەوەندییەکانی یەکێتی بم و ئاگاشم لە هیچ شتێک نەبێت".

ئاڤا ئەوەشی زانیوە، گەنگەشەیەک دروست بووە لەنێوانیان، هەندێک لە بەرپرسانی یەکێتیش کەوتوونەتە نێوانیان بۆ ئاشکردنەوەی.

ئەوەی پێویستە بیزانیت: ئەنجوومەنی پاراستنی بەرژەوەندییە باڵاكانی یەكێتی لە کۆنگرەی پێنجەم لە ساڵی 2023 دامەرزا و شێخ جەعفەر بە لێپرسراوی ئەنجوومەنەکە هەڵبێژردرا. هەرچەندە بە ناو پۆستێکی باڵایە، بەڵام بە وتەی کەسە نزیکەکانی شێخ جەعفەر، لە ساڵانی ڕابردوودا ڕۆڵێکی ئەوتۆی لە بەڕێوەبردنی یەکێتیدا نەبووە.

لەلایەکی دیکەوە: دوێنێ بافڵ تاڵەبانی، سەرۆکی یەکێتی بە جلێکی سەربازییەوە سەردانی دژەتیرۆری یەکێتی کرد. بافڵ تاڵەبانی وەسفی هێزەکانی دژەتیرۆری کردووە و جەختی لەسەر بەردەوامیی هەوڵەکانیان بۆ پاراستنی زیاتری ئاسایش و ئارامیی هەرێمی کوردستان کردووەتەوە.

جەختی لە گرنگیی بەردەوامیی مەشق و ڕاهێنان و هەماهەنگی و هاوکاریی نێوان سەرجەم دەزگا ئەمنییەکان کردەوە و ڕێنمایی پێدان وەکو یەک تیمی هاوبەش هەمیشە ئەرکە نیشتمانییەکان ڕابپەڕێنن.

شێخ جەعفەر مستەفا، یەکێک لە سەرکردە و فەرماندە دێرینەکانی یەکێتی نیشتمانی کوردستانە، ئێستا لێپرسراوی ئەنجوومەنی پاراستنی بەرژەوەندییە باڵاكانی یەكێتییە و جێگری سەرۆکی هەرێمی کوردستانیشە.