قەبارەی گلدانەوەی ئاو لە بەنداوی مەهاباد بەراورد بە ساڵی ڕابردوو بە ڕێژەی 41% کەمیکردووە

ئاڤا نیوز

ئاستی ئاوی بەنداوی مەهاباد لە ڕۆژهەڵاتی کوردستان ساڵی ڕابردوو لەم کاتەدا هەزار و 348 مەتر سێجا بووە، بەڵام ئەمساڵ بۆ هەزار و 342 مەتر سێجا دابەزیوە.

وێنە گەورەکە: گۆڕانکارییەکانی کەشوهەوا و وشکەساڵی کاریگەریی گەورەیان لەسەر ئاستی ئاو و سەرچاوەکانی ئاو دروستکردووە، لەم چەند ڕۆژەی ڕابردووشدا شارەکانی ئێران بەگشتی و بەشێک لە شارەکانی ڕۆژهەڵاتی کوردستان ڕووبەڕووی قەیرانی کەمئاوی بوونەتەوە. بەڕێوەبەری کاروباری ئاوی مەهابادیش دابەزینی نزیکەی حەوت مەتر لە ئاستی ئاوی بەنداوی مەهاباد بە مەترسیی دەزانێت و دەڵێت، ئێستا بەرهەمی ئاوی بەنداوەکە بۆ خواردنەوە، بەهەڵمبوون و پێداویستییەکانی دیکە گەیشتووەتە 1.5 مەتر سێجا لە چرکەیەکدا، لە کاتێکدا ساڵی ڕابردوو لەم کاتەدا لە چرکەیەکدا 15.1 مەتر سێجا بوو.

لێدوانی فەرمی: خالد ڕەحمانی، بەڕێوەبەری کاروباری ئاوی مەهاباد ڕایدەگەیێنێت: لە کەرتی کشتوکاڵیشدا ڕێژەی بەردانەوەی ئاو بەشێوەیەکی بەرچاو کەمی کردووە و ئەمساڵ تەنیا یەک جار بەڕێژەی 23 ملیۆن مەتر سێجا ئاو بەردراوەتەوە. هاوکات قەبارەی گلدانەوەی ئاو لە بەنداوەکەدا لە 100 ملیۆن مەتر سێجای ساڵی ڕابردوو بۆ 59 ملیۆن مەتر سێجا لەمساڵدا دابەزیوە، کە دەکاتە ڕێژەی 41% و ئەمەش ئاماژەیە بۆ دۆخی مەترسیداری سەرچاوەکانی ئاو لە ناوچەکەدا.

باکگراوند: بەنداوی مەهاباد یەکێک لە گرنگترین سەرچاوەکانی ئاوی پارێزگای ورمێیە کە ڕۆڵی سەرەکیی هەیە لە دابینکردنی ئاوی خواردنەوە بۆ شاری مەهاباد و چەند گوندێکی دەوروبەری، جگە لە دابینکردنی ئاوی خواردنەوە بۆ شارەکە، بەنداوی مەهاباد ئاو بۆ زیاتر لە 12 هەزار هێکتار زەویی کشتوکاڵیی پارێزگاکە دابین دەکات.