ئاڤا نهێنییەک لەبارەی غازی بیرەنەوتەکانی پارێزگای میسان ئاشکرا دەکات

ئاڤا نیوز

 

بەگوێرەی زانیارییەکانی ئاڤا، لە پارێزگای میسان ڕۆژانە هەزاران پێ سێجا غازی هاوەڵ [ئەو غازەی لەکاتی دەرهێنانی نەوت لە بیرە نەوتییەکانەوە دەردەچێت] لە بیرە نەوتەکانی ئەو پارێزگایەوە بۆ ئێران دەگوازرێتەوە و پسپۆڕێکی ئابووریش دەڵێت، " دواتر هەمان غاز بۆ عێراق دەگەڕێندرێتەوە."

 

زانیاریی ئاڤا: سەرچاوەیەکی ئاگادار کە قسەی بۆ ئاڤا کردووە لە کۆمپانیای نەوتی باشوور، ئاشکرای کرد، عێراق لەگەڵ ئێران ڕێککەوتووە لەسەر گواستنەوەی 100 ملیۆن پێ سێجا غازی هاوەڵ لە ڕۆژێکدا لە بیرە نەوتەکانی میسانەوە بۆ خاکی ئێران و دواتر وەک سووتەمەنی لێی وەردەگرێتەوە.

 

لەلایەکی دیکە: نەبیل مەرسومی، پسپۆڕی بواری ئابووری، ناوەڕۆکی ڕێککەوتنەکەی نێوان عێراق و ئێران ئاشکرا دەکات و دەڵێت، عێراق بڕێکی زۆر لە غازی هاوەڵی بیرە نەوتەکانی پارێزگای میسان ڕەوانەی ئێران دەکات بە مەبەستی چارەسەرکردن، دواتریش وەک سووتەمەنی بۆ وێستگەکانی بەرهەمهێنانی کارەبا لێی وەردەگرێتەوە.

 

زانیاریی زیاتر: ئامانجی ئەم ڕێککەوتنە، وەک مەرسومی ڕوونیکردووەتەوە، چارەسەرکردنی ئەو بڕە غازەیە لە ئێران و دووبارە گەڕاندنەوەیەتی بۆ عێراق بۆ ئەوەی وەک سووتەمەنی لە وێستگەکانی بەرهەمهێنانی کارەبادا بەکاربهێنرێت.

 

ئەوەی پێویستە بیزانیت:  عێراق چەندین ساڵه پشت به هاوردەکردنی کارەبا و غازی ئێران دەبەستێت، بە تایبەتیش لە وەرزی هاوین، ئەمەش دوای ئەو لێخۆشبوونەی لەلایەن ئەمریکاوە بە عێراق درابوو بۆ هاوردەکردنی کارەبا و غازی ئێران، بەڵام  لە چوارچێوەی تووندکردنەوەی سزاکانی سەر ئێران، ڕۆژی چوارشەممە 05-02-2025، دۆناڵد ترەمپ، سەرۆکی ئەمریکا بڕیاری دا بە هەڵوەشاندنەوەی ئەو لێخۆشبوونە.