وەزیری نەوتی عێراق کێڵگە نەوتییەکانی کەرکووک بەسەر دەکاتەوە

ئاڤا نیوز

سەرلەبەیانی ئەمڕۆ چوارشەممە جێگری سەرۆکوەزیران عێراق بۆ کارووباری وزە کە هاوکات وەزیری نەوتیشە، سەردانی کێڵگە نەوتییەکانی پارێزگای کەرکووکی کرد.

وێنە گەورەکە: مانگی ئازاری ئەمساڵ حکومەتی عێراق و کۆمپانیای بریتیش پیترۆلیۆم (BP) بۆ پەرەپێدانی هەر چوار کێڵگە نەوتییەکەی کەرکووک ڕێککەوتنێکی 25 ساڵییان واژۆکرد، بەگوێرەی ڕێککەوتنەکە ئاستی بەرهەمهێنانی نەوت لە 308 هەزار بەرمیلەوە بۆ 420 هەزار بەرمیل زیاد دەکرێت، هاوکات ئاستی بەرهەمهێنانی غاز ڕۆژانە دەگەیێنرێتە 400 ملیۆن پێ سێجا و بۆ ماوەی 16 ساڵ بەردەوام دەبێت.

زانیاریی بەدەستهاتوو: سەرلەبەیانی ئەمڕۆ حەیان عەبدولغەنی، جێگری سەرۆکوەزیرانی عێراق بۆ کارووباری وزە و وەزیری نەوت سەردانی کێڵگەی نەوتی جمبوری لە پارێزگای کەرکووک کردووە و دامەزراوەیەکی نوێی نەوتی تیایدا کردووەتەوە، بڕیاریشە دواتر لەسەر ڕێگەی کەرکووک-هەولێر دامەزراوەیەکی دیکەی نوێی وزە لەنزیک گورگەچاڵ بکاتەوە.

باکگراوند: 26ی ئازاری ئەمساڵ و بەمەبەستی نۆژەنکردنەوە و زیادکردنی بەرهەمهێنانی نەوت لە کێڵگەکانی قوبەی بابا ‌و بای حەسەن و جمبور و ‌خەباز و وەبەرهێنان لە کەرتی غاز و گەڕان بەدوای بیرەنەوتی نوێدا لە سنووری پارێزگای کەرکووک، بە چاودێریی محەممەد شیاع سوودانی، سەرۆکوەزیرانی عێراق، وەزارەتی نەوتی فیدراڵ و  کۆمپانیای بریتش پترۆڵیۆم BPـی بەریتانی ڕێککەوتنێکی درێژخایەنیان واژۆکرد.