ئاڤا "فێڵێکی" نەخۆشخانە تایبەتییەکان لە کەسوکاری نەخۆش ئاشکرا دەکات

ئاڤا نیوز

ئاڤا میدیا بەدواداچوون بۆ کارێکی نایاسایی و مەترسیداری نەخۆشخانە تایبەتەکان دەکات، کە تێیدا نەخۆش و کەسوکارەکانیان پێش ئەنجامدانی نەشتەرگەری ناچار دەکرێن بەڵێننامەیەک واژۆ بکەن کە مافی تۆمارکردنی سکاڵایان لێ زەوت دەکات، تەنانەت ئەگەر دەرئەنجامی نەشتەرگەرییەکە گیانلەدەستدانیش بێت.

 

بەدواداچوونی ئاڤا: بەپێی ئەو بەدواداچوونە تایبەتەی ئاڤا کردوویەتی، ئەم بەڵێننامانە کە نەخۆشخانە تایبەتەکان بە کەسووکاری نەخۆش پێش ئەنجامدانی نەشتەرگەری پڕی دەکەنەوە، چەند خاڵێکی سەرەکی لەخۆدەگرن:

-نەخۆش دەبێت ڕازی بێت کە پزیشکی سەرپەرشتیار بۆی هەیە پزیشکی دیکە بهێنێتە ژووری نەشتەرگەری بۆ یارمەتیدانی.

- نەخۆش دەبێت پێشوەختە ڕازی بێت بە قبووڵ کردنی هەر گرفتێکی تەندروستی کە ڕووبەڕووی دەبێتەوە، تەنانەت ئەگەر مەترسیدار بێت و ببێتە هۆی گیانلەدەستدانی.

-وازهێنان لە مافی سکاڵا: مەترسیدارترین خاڵ ئەوەیە کە نەخۆش و کەسوکارەکەی بەڵێن دەدەن کە لە هیچ بارودۆخێکدا سکاڵای یاسایی لەسەر پزیشک و نەخۆشخانەکە تۆمار نەکەن.

لێدوانی فەرمی: د. سەرکار سوورچی، وتەبێژی وەزارەتی تەندروستیی هەرێمی کوردستان ڕایگەیاند: "ئەمە بەڵێننامەیەکی نایاساییە و هیچ مافێکی نەخۆشی تێدا لەبەرچاو نەگیراوە، بەتایبەتی ئەو خاڵەی کە ڕێگری لە سکاڵاکردن دەکات."

د. سەرکار ئاماژەی بەوەشکرد، بەپێی یاسای ژمارە چواری ساڵی 2020ی پەرلەمانی کوردستان، نەخۆش مافی تەواوی هەیە هەر چارەسەرێک ڕەت بکاتەوە کە پێی ڕازی نییە. هەروەها وتی: "ئێمە وەک وەزارەت، کلێشەیەکی ستانداردی تایبەت بە وەرگرتنی ڕەزامەندیی نەخۆشمان هەیە و بۆ سەرجەم نەخۆشخانە حکومی و تایبەتەکانمان ناردووە، دەبێت هەمووان پێوەی پابەند بن."

لەلایەکی دیکە: لەلایەن خۆیەوە، د. دلۆڤان محەممەد، بەڕێوەبەری گشتیی تەندروستیی هەولێر، جەختی لەسەر پابەندبوونی نەخۆشخانە حکومییەکان بە کلێشە فەرمییەکەی وەزارەت کردەوە و ڕایگەیاند: "پێویستە نەخۆشخانە تایبەتەکانیش بە هەمان شێوە پابەند بن، نەک بە ئارەزووی خۆیان و بۆ بەرژەوەندیی خۆیان بەڵێننامە دابنێن و نەخۆش ناچار بە واژۆکردنی بکەن."

هاوکات: بەڵێنی دا کە بەدواداچوونی ورد بۆ ئەم بابەتە بکەن و وتی: "لیژنەکانمان ڕادەسپێرین و لە هەر نەخۆشخانەیەکدا ئەم جۆرە سەرپێچییە ببینین، بێگومان ڕێکاری پێویستی بەرامبەر دەگرینەبەر."