لە قەزایەكی سنووری پارێزگای هەولێر ڤایرۆسێکی مەترسیدار بڵاودەبێتەوە

ئاڤا نیوز

 

بەهۆی بڵاوبوونەوەی جۆرە ڤایرۆسێکی مەترسیدار لەنێو بەشێک لە پەلەوەرەکانی سنووری قەزای خەبات، ژمارەیەکی زۆری قاز، مریشک و مراوی مردار بوونەتەوە، پزیشکێکی ڤێرتێرنەریش دەڵێت، ئەمە نەخۆشیی نیوکاسڵە و دەبێتە هۆی مرداربوونەوەی ڕاستەوخۆی پەلەوەرەکان.

 

چیرۆکی سەرەکی: ساڵانە لە کۆتایی وەرزی پاییز و سەرەتای زستان بەهۆی گۆڕانی کەش و هەواوە چەند نەخۆشییەک لەنێو ئاژەڵ و پەلەوەرەکان بڵاودەبێتەوە، بەهۆیەوە ژمارەیەکی زۆر پەلەوەر مردار دەبنەوە و زیانی ماددیی زۆریش بەر خاوەنەکانیان دەکەوێت.

 

لێدوانی فەرمی: دکتۆر سوبحی کاکەیی، پزیشکی پسپۆڕی ڤێرتێرنەری کە لە سنووری قەزای خەباتی سەر بە هەولێر نۆڕینگەی هەیە زانیارییەکانی بۆ ئاڤا پشتڕاست کردەوە و گوتی: نزیکەی مانگێک دەبێت ڤایرۆسی نیوکاسڵ لەنێو پەلەوەرەکان بەتایبەت قاز، مریشک و مراوی بڵابووەتەوە بەهۆیەوە چەندین پەلەوەر مردار بوونەتەوە، ڕۆژانە چەندین کەس بۆ وەرگرتنی چارەسەر بۆ پەلەوەرەکانیان سەردانی نۆڕینگەکەم دەکەن.

 

زانیاریی زیاتر: سەبارەت بە کاریگەریی ڤایرۆسەکە لەسەر مرۆڤ، دکتۆر سوبحی گوتی، ئەم نەخۆشییە مەترسیی لەسەر مرۆڤ نییە، بەڵام باشترە خۆی لێ بپارێزرێ.

 

لەلایەکی دیکەوە: فیراس سدیق، بەڕێوەبەری سامانی ئاژەڵ لە وەزارەتی کشتوکاڵ بە ئاڤا میدیای ڕاگەیاند، لەگەڵ ئەوەی ساڵانە لەم وەرزەدا نەخۆشی لەنێو پەلەوەرەکان بڵاودەبێتەوە، بەڵام تا ئێستا بە فەرمی هیچ کەسێک سەردانی نەکردووین و هیچ حاڵەتێک تۆمار نەکراوە.

 

چارەسەرییەکان: سەبارەت بە ڕێگاکانی چارەسەرکردنی نەخۆشییەکە، دکتۆر سوبحی کاکەیی گوتی، پێویستە لەسەر خاوەن پەلەوەرەکان بەر لە هاتنی وەرزی زستان پەلەوەرەکانیان بە ڤاکسینی نیوکاسڵ بکوتن بۆ ئەوەی تووشی نەخۆشییەکە نەبن، چونکە نەخۆشییەکە ڤایرۆسییە و بەخێرایی بڵاودەبێتەوە، کە بڵاویش بووەوە کۆنترۆڵکردنی ئاسان نابێت.