پرۆژەی گەشتیاریی كۆڕنیشی هەولێر، نرخی زەوی و خانووی دەوروبەری بەرزكردووەتەوە

ئاڤا نیوز

دوای ڕاگەیاندنی پرۆژەی کۆڕنیشی هەولێر لەلایەن پارێزگاری هەولێرەوە، نرخی زەوی و خانوو لە گەڕەکەکانی نزیک کۆڕنیشەکە بەرزبووەتەوە و خواستیش لەسەر کڕینی شوێنە بازرگانییەکانی دەوروبەری، زیادیکردووە.

وێنە گەورەکە: ڕۆژی 25ـی ئەیلوولی 2025، پارێزگاری هەولێر کۆبوونەوەیەکی تایبەتی لەگەڵ کۆمپانیای "کەی وەن" و چەند ئەندازیارێکی وڵاتی ئیتاڵیا ئەنجامدا و لایەنە پەیوەندیدارەکانیش ئامادەبوون، بەمەبەستی دیزاینکردن و پەرەپێدانی کەناڵی کۆڕنیشی هەولێر و پڕئاوکردنی وەک پڕۆژەیەکی گرنگی گەشتیاری و ژینگەیی بۆ شاری هەولێر.

لێدوانی فەرمی: جەبار محەممەد، کە خاوەن نووسینگەی کڕین و فرۆشتنی زەویوزارە لەو شوێنە، تایبەت بە ئاڤا ڕایگەیاند، دوای ڕاگەیاندنی پرۆژەکە، لە گەڕەکەکانی فەرمانبەران و گەلاوێژ و پێنجی حەسارۆک، ئەو خانووانەی ڕوویان لە کۆڕنیشە، چەند هەزار دۆلارێک هاتووەتە سەر نرخەکانیان.

باسی لەوەشکرد، لەگەڵ جێبەجێکردنی پرۆژەکە، بەشێکی زۆری تەنیشت کۆڕنیشەکە بەئەگەرێکی زۆرەوە دەبێتە شوێنێکی بازرگانی و گەشتیاری، خەڵکانێک لەئێستاوە بیرۆکەی کردنەوەی کافتریا و چێشتخانە و شوێنی بچووکی گەشتیارییان لەلا دروستبووە، هەموو ئەوانەش کاریگەری دەبێت لەسەر بەرزبوونەوەی نرخی زەوی و خانوو.

شێوازی جێبەجێکردن: دوای دیزاینکردن و دیراسەی وردی تێچووی پرۆژەکە و دابینکردنی پێداویستییەکانی، ئاو لە زێی گەورەوە بۆ کۆڕنیشەکە ڕادەکێشرێت، هاوکات لەڕێگەی دروستکردنی سێ پۆند و کۆکردنەوەی ئاو تیایاندا، ئاو بە بەردەوامی بە کۆڕنیشەکە دەگەیێنرێت. پارێزگاری هەولێر لە لێداونێکی ڕۆژنامەوانی وتی، وەک قۆناغی یەکەم ڕێکخستنی کۆرنیشەکە بە کردەیی دەستیپێکردووە و لە ڕێگای ئامێرەکان دەستکراوە بە خاوێنکردنەوەی ڕێڕەوەکە.

باکگراوند: کۆڕنیشی هەولێر دەکەوێتە بەشی ڕۆژهەڵاتی شاری هەولێر، بەتەنیشت هەریەک لە گەڕەکەکانی پێنجی حەسارۆک، گەلاوێژ، فەرمانبەران و چەند گەڕەکێکی دیکەدا دەڕوات، ساڵی 1972 بۆ پاراستنی شاری هەولێر لە لافاو وەک ڕێڕەوێکی ئاوی دروستکراوە و زیاتر لە وەرزی زستاندا ئاوی تێدا کۆدەبێتەوە، بەڵام بەهۆی مانەوەی ئاوەکە و تێکەڵبوونی بە ئاوەڕۆی بەشێک لە گەڕەکەکان و پاشماوەی ماڵان و خۆڵ و خاشاک، بۆنێکی ناخۆش دروست دەبێت و بووەتە هۆی بێزاریی خەڵک، ئێستا پلانی پارێزگای هەولێر  ئەوەیە کە دیمەنەکە پێچەوانە بکاتەوە و بیکات بە پڕۆژەیەکی گرنگی گەشتیاری.