ئەنجوومەنی وەزیرانی عێراق ڕەنگی واژۆی بەرپرسان بەپێی پلەکانیان دیاری دەکات

ئاڤا نیوز

ئەمینداریەتی گشتیی ئەنجوومەنی وەزیرانی عێراق لە بڕیارێکدا ڕەنگی واژۆی بەرپرسانی حکومەت لەسەر نووسراوە فەرمییەکان بەپێی پلە و پۆستەکانیان دیاری دەکات.

 

چیرۆکی سەرەکی: بەپێی ئەو بەڵگەنامەیەی کە لە ئەمینداریەتییەکەوە دەرچووە، بڕیارەکە لەسەر بنەمای پێشنیازەکانی "فەرمانی دیوانی ژمارە (83)ی ساڵی 2024" و بە ڕەزامەندیی سەرۆکوەزیران دەرچووە بە مەبەستی ڕێکخستنی چوارچێوە کارگێڕییەکان بۆ واژۆی خاوەن پۆستە باڵاکان لە سەرجەم دامەزراوەکانی دەوڵەتدا. کە بەم شێوەیەی خوارەوە دەبێت:

 

یەکەم: ڕەنگی سووری تۆخ

تەرخانکراوە بۆ واژۆی هەر یەک لە:
•    سەرۆککۆمار
•    سەرۆکوەزیران
•    سەرۆکی ئەنجوومەنی نوێنەران
•    سەرۆکی ئەنجوومەنی باڵای دادوەری
•    سەرۆکی دادگای باڵای فیدراڵی

دووەم: ڕەنگی سووری کاڵ

تەرخانکراوە بۆ واژۆی هەر یەک لە:

• جێگرانی سەرۆکەکان (جێگرانی سەرۆککۆمار، جێگرانی سەرۆکوەزیران، جێگرانی سەرۆکی پەرلەمان)
•    وەزیرەکان و ئەوانەی بە پلەی وەزیرن.
•    پارێزگارەکان و سەرۆکی ئەنجوومەنی پارێزگاکان.

سێیەم: ڕەنگی سەوز

تەرخانکراوە بۆ واژۆی هەر یەک لە:
•    بریکارانی وەزارەتەکان و ئەوانەی بە پلەی بریکارن.
•    خاوەن پلە تایبەتەکان.
•   سەرۆکی دەستە سەربەخۆکان (ئەوانەی بە پلەی بریکاری وەزیرن)

 

ئەوەی پێویستە بزانیت: ئەم بڕیارەش لە چوارچێوەی هەوڵەکانی حکومەتدایە بۆ یەکخستنی چوارچێوە کارگێڕییەکان و بەهێزکردنی شەفافیەت لە زنجیرەی نامەگۆڕی فەرمیدا لەنێوان وەزارەت و لایەنە پەیوەندیدارەکان، هەروەها ئاسانکاری بۆ پرۆسەکانی بەڵگەنامەکردن و بەدواداچوون دەکات.