دوو ملیار دیناری دیكە بۆ چارەسەركردنی گرفتی كەمئاویی هەولێر تەرخان كرا

ئاڤا نیوز

بۆ چوارەم مانگ لەسەر یەك، بۆ چارەسەركردنی گرفتی كەمئاوی لە شاری هەولێر و دەوروبەری، بە بڕیاری سەرۆكوەزیران مەسرور بارزانی، دوو ملیار دینار تەرخان كرا.

چیرۆکی سەرەکی: ئەمڕۆ پێنجشه‌ممه‌ 2025-08-07، لە دیوانی پارێزگای هەولێر، بە ئامادەبوونی ئومێد خۆشناو، پارێزگاری هەولێر كۆبوونەوەیەك لەنێوان لایەنە پەیوەندیدارەكان بە گرفتی كەمئاوی بەڕێوەچوو.

لێدوانی فەرمی: ئومێد خۆشناو، پارێزگای هەولێر ڕایگەیاند: بە بڕیاری سەرۆكوەزیران مەسرور بارزانی، لە مانگه‌كانی ( 5، 6، 7 و 8 )ـی ئەمساڵ بودجه‌ی فریاكەوتن بۆ چاره‌سه‌ركردنی گرفتی كەمئاویی هەولێر و ده‌وروبه‌ری و كۆیه‌ و ئاودێری و باخچه‌ و پاركه‌كان و دا‌رستان خه‌رج كردووه‌.

جگە لە پڕۆژەی فریاگوزاریی خێرای هەولێر، پڕۆژەی ئاوی قوشتەپەش گرنگیی زۆری بۆ چارەسەركردنی گرفتی كەمئاویی ناوچەكە هەیە كە ئێستا 56%ـی پڕۆژەكە ته‌واو بووه‌ .

زانیاریی زیاتر: لە كۆبوونەوەكەدا به ‌وردی له‌ هه‌نگاوه‌كانی كاری فریاگوزاریی ئاوی هه‌ولێر كۆڵرایەوە و هه‌ڵوه‌سته‌ له‌سه‌ر خاڵە‌ ئه‌رێنی و نه‌رێنییه‌كان كرا، كه‌ ئێستا به‌ ڕێژه‌ی 90% كاره‌كان كۆتاییان هاتووه ‌و به‌ گوێره‌ی ئه‌جێندا و پلانی كاركردنه‌كانیش بڕیاره‌ له‌ مانگی 11ـی ئه‌مساڵدا ته‌واوی ئه‌و پرۆژه‌ ستراتیژییه‌ كۆتایی پێ بێت، جەخت له‌وه‌ش كرایه‌وه‌ كه‌ پڕۆژەی فریاگوزاریی ئاوی هەولێر، خاڵی گۆڕانکاری ده‌بێ بە ئاراستەی باشترکردنی خزمەتگوزارییەکان لە پارێزگای هەولێر.