كۆمەڵگەیەكی فراوانی گەشتیاری لە گەلی شێرانەی شێلادزێ بونیاد دەنرێت

ئاڤا نیوز

لە ئاییندەیەكی نزیكدا كۆمەڵگەیەكی گەشتیاریی مۆدێرن بەسەرجەم خزمەتگوزارییەكانەوە لە ناوچەی گەشتیاریی گەلی شێرانە لە شێلادزێ جێبەجێ دەكرێت، پرۆژەكەش لە قۆناغی دیزاین و ڕێكارە كارگێڕییەكاندایە.

وێنە گەورەکە: لەچوارچێوەی پلانی درێژخایەنی هەشت ساڵەی كابینەی نۆیەمی حكومەتی هەرێمی كوردستان بۆ پەرەپێدانی سێكتەری گەشتیاری، ژمارەیەك پرۆژەی گرنگ و ستراتیژی لە ناوچە گەشتیارییە جیاجیاكانی هەرێمی كوردستان جێبەجێ دەكرێن، ئاڤا زانیویەتی؛ دوای ڕاگەیاندنی پرۆژە فراوانەكانی ناوچە گەشتیارییەكانی ئیدارەی سەربەخۆی سۆران، لە ناوچەی گەشتیاریی گەلی شێرانە کە دەکەوێتە سنووری شێلادزێ لە پارێزگای دهۆک، پرۆژەیەکی گەشتیاریی فراوان جێبەجێ دەکرێت.

لێدوانی فەرمی: ئیبراهیم عەبدولمەجید، وتەبێژی دەستەی گشتیی گەشتوگوزاری هەرێم تایبەت بە ئاڤا ڕایگەیاند، وەبەرهێنەرێكی پارێزگای دهۆك، پرۆپۆزەلی دروستكردنی كۆمەڵگەیەكی گەشتیاریی بە سەرجەم پێكهاتەكانییەوە لە ناوچەی گەشتیاریی گەلی شێرانە لە شێلادزێ، ڕادەستی بەڕێوەبەرایەتیی گەشتوگوزاری دهۆك كردووە و شوێنی پرۆژەكەش دیاریكراوە و ئێستا لە قۆناغی دیزاین و ڕێكارە كارگێڕییەكاندایە.

وتەبێژی دەستەی گەشتوگوزاری هەرێمی كوردستان ڕاشیگەیاند، بۆ ئەوەی زۆرترین ژمارەی گەشتیار بە ئاسانی بە ناوچە گەشتیارییەكان بگەن، حكومەتی هەرێمی كوردستان هەڵمەتێكی فراوانی دروستكردنی ڕێگاوبانی دەستپێكردووە كە وا دەكات جموجۆڵی گەشتیاری، بچێتە ئاستێكی پێشكەوتووتر.

ئەوەی پێویستە بیزانیت: كابینەی نۆیەمی حكومەتی هەرێمی كوردستان، بایەخێكی تایبەت بە سێكتەری گەشتوگوزار دەدات بە ئامانجی ئەوەی ببێتە سەرچاوەی داهات بۆ كوردستان، بۆ ئەمەش؛ لە ماوەی پێنج ساڵی تەمەنی كابینەكە، سەرمایەی بەگەڕخراو لە سێكتەری گەشتیاری حەوت ملیار و 500 ملیۆن دۆلارە و تەنها لە ساڵی ڕابردوودا 28 پرۆژەی گەورەی گەشتیاری لە ناوچە جیاوازەكان كراون.