لە ئاکرێ پێشنوێژ و وتارخوێنێک بە تۆمەتی سیحر و جادوو دەستگیر کرا

ئاڤا نیوز

بەڕێوەبەرایەتیی پۆلیسی ئاکرێ ڕایگەیاند، کەسێکیان دەستگیرکردووە کە بە ناوی ئایینەوە سەرقاڵی کاری سیحر و نوشتەکردن بووە و زیاتر لە 300 نوشتە و کاری جادوویی بۆ خەڵکی ناوچەکە کردووە، هاوکات ئەو کەسە پێشنوێژ و وتارخوێنی یەکێک لە مزگەوتەکانی دەرەوەی ئاکرێ بووە.

ڕاگەیێنراوی فەرمی: بەگوێرەی ڕاگەیێندراوێکی پۆلیسی ئاکرێ، نووسینگەی نەهێشتنی تاوانی سیپە، دوای کۆکردنەوەی زانیاریی ورد، تۆمەتبار (ع. ت. ج) کە تەمەنی نزیکەی 60 ساڵە، دەستگیرکردووە لە کاتی دەستگیرکردنیدا، دەست بەسەر کۆمەڵێک کتێبی تایبەت بە سیحر و جادوو و کەرەستەی نوشتەکردندا گیراوە.

دانپێدانانەکان و جۆری کارەکانی

لە میانی لێکۆڵینەوەکاندا، تۆمەتبارەکە دانی بە تاوانەکانیدا ناوە و ئاشکرای کردووە کە کاری جادوویی بۆ "بەیەکگەیاندن" و هەروەها "تێکدانی نێوانی خەڵک" کردووە و لەم ڕێگەیەوە پارەی لە هاووڵاتییان وەرگرتووە.

 

نموونەی بەشێک لە نووشتە و سیحرەکانی:

ئەگەر کەسێک چووبێتە لای و داوای کردبێت کچێک شووی پێبکات، ئەم سیحری بۆ کردووە.

تێکدانی نێوانی هاوژینان: جادووی لە پیاوێک کردووە کە دوو ژنی هەبووە، بە شێوەیەک کە وا لە پیاوەکە بکات یەکێکیانی خۆشبوێت و ڕقی لەوی تریان ببێتەوە.

نووشتەی بووک و خەسوو: ژنێک داوای لێکردووە سیحرێکی بۆ بکات تا خەسوو و خەزووری خۆشیانبوێت و لەبەرامبەردا ڕقیان لە هەوێکەی ببێتەوە.

ئەوەی پێویستە بیزانیت: پۆلیسی ئاکرێ ڕایگەیاندووە کە تۆمەتبارەکە بەپێی ماددەی یاسایی ڕاگیراوە و لێکۆڵینەوە لەگەڵیدا بەردەوامە بۆ ئاشکراکردنی هەموو لایەنەکانی ئەم کەیسە.