خێزانێکی کورد لە نەخۆشخانەیەکی تورکیا بەند دەکرێن

ئاڤا نیوز

 

خێزانێکی کورد لە یەکێک لە نەخۆشخانەکانی تورکیا پاسپۆرتەکەیان لێ وەرگیراوە و دەستبەسەر کراون و ڕێگەی نادرێت نەخۆشخانەکە جێبهێڵن. تا ئەو "کاتەی ئەو بڕە پارەیە دەدەن کە نەخۆشخانەکە داوایان لێ دەکات".

 

چیرۆکی سەرەکی: خێزانێکی کورد کە بۆ چارەسەری منداڵە کچەکەیان ڕوویان لە وڵاتی تورکیا کردووە، لە یەکێک لە نەخۆشخانەکانی ئەو وڵاتە دەستبەسەر کراون و پاسپۆرتەکانیان لێ وەرگیراوە بەرپرسانی نەخۆشخانەکە دەڵێن تا ئەو کاتەی تەواوی خەرجییەکانیان نەدەن کە بە هەزاران دۆلار مەزەندە دەکرێت. ڕێگە نادەین نەخۆشخانەکە جێ بهێڵن.

کۆیار، منداڵە کچە بچووکەکەی ئەم خێزانەیە و تووشبووی نەخۆشییەکی بۆماوەیی و دەگمەنە کە بریتییە لە "کەمبوونەوەی ئەنزیمی خوێن". ئەم نەخۆشییە دەبێتە هۆی تێکشکانی خڕۆکە سوورەکانی خوێن و کەمخوێنیی توند.

باوکی کۆیار چیرۆکەکەی بۆ ئاڤا نیوز گێڕایەوە و وتی: "جاری پێشوو کە سەردانی هەمان نەخۆشخانەمان کرد، پێیان گوتین کە بۆ جاری داهاتوو هیچ پارەیەکتان لێ وەرناگرین و هەموو چارەسەرێک لەسەر ئەستۆی ئێمەیە."

بەڵام ئەمجارە سیناریۆکە بە تەواوی پێچەوانە بووەتەوە. باوکی کۆیار دەڵێت: "کەچی ئەمجارە، دەرمانێکیان بە کچەکەم داوە کە هیچ سوودێکی نەبووە و چارەسەرەکە سەرکەوتوو نەبووە، لە بەرامبەردا داوای دوو هەزار و 500 دۆلارمان لێ دەکەن. جگە لەوەش، بۆ مانەوەی تەنها چوار شەو لە نەخۆشخانەکە، داوای دوو هەزار دۆلاری تریشمان لێ دەکەن."

"پاسپۆرتەکانمان دەستبەسەرکراوە و ناهێڵن بڕۆین"

کێشەکە تەنها داواکردنی پارەکە نییە، بەڵکو نەخۆشخانەکە پەنای بۆ ڕێکاری توندتر بردووە. باوکی کۆیار دەڵێت: "نەخۆشخانەکە پاسپۆرتەکانی لێ حجز کردووین و ڕێگەمان پێنادەن لە نەخۆشخانەکە بڕۆینە دەرەوە. پێیان وتووین تاوەکو تەواوی پارەکە نەدەن، بۆتان نییە پێتان لەم نەخۆشخانەیە ببەنە دەرەوە."