بۆچی کۆمیسیۆن ژمارە 256ـی لە تیروپشکی ژمارەی حیزب و هاوپەیمانێتییەکان دەرکردووە؟

ئاڤا نیوز

ئەمڕۆ کۆمیسیۆنی باڵای سەربەخۆی هەڵبژاردنی عێراق ژمارەی بە حیزب و هاوپەیمانێتییەکان بۆ بەشداری لە هەڵبژاردنی پەرلەمان دا و ژمارەکانیش لە 201ەوە دەستیانپێکرد، بەڵام ژمارە 256 نەدرا بە هیچ لایەنێک ئەویش بەهۆی ئەوەی ژمارەیەکی دڵخواز نییە و هیچ لایەنێک نایەوێت بەری بکەوێت، هۆکارەکەشی بۆ ماددەی 456 لە یاسای سزادانی عێراق دەگەڕێتەوە کە تایبەتە بە فێڵکردن، ساختەکاریی و گەندەڵییەوە.

وێنە گەورەکە: ئەمڕۆ شەممە کۆمیسیۆن ژمارەی بە حیزب، هاوپەیمانێتی و لیستە تاکە کەسییەکان دا، ئەم ژمارەیەی بەلایەنەکان دەدرێت لەکاتی بانگەشەی هەڵبژاردن گرنگییەکی زۆری هەیە و بەهۆی زانینی ئەو ژمارەیە، دەنگدەر دەتوانێت بە ئاسانی ناوی لیستی دڵخوازی بدۆزێتەوە و چوارگۆشەی تەنیشت ئەو ژمارەیە کە لۆگۆی حیزب و هاوپەیمانێتییەکەشی لێوەدیارە، بە قەڵەمی کۆمیسیۆن مۆر دەکات.

لێدوانی فەرمی: جومانە غەڵای، وتەبێژی کۆمیسیۆنی باڵای سەربەخۆی هەڵبژاردنی عێراق ڕایگەیاند، لە تیروپشکەکەی ئەمڕۆدا ژمارەی 256 نادرێت بە هیچ لایەنێک، ئەویش بەهۆکاری مانای نەرێنیی ژمارەکە لە ئاستی کۆمەڵایەتیی و کۆمەڵگەدا.

پێدراوە ڕاستەکان: پێنەدانی ژمارە 56 پەیوەندی بە ماددەی 456 لە یاسای سزادانی عێراقی هەیە کە وایکردووە ببێتە ژمارەیەکی نەخوازراو، ئەم ماددەیەش دەڵێت، هەرکەسێک بەڕێگەی فێڵکردن هەستێک بە گواستنەوەی ماڵ و دارایی، درۆ یان ڕاپۆرتی ساختە بکات و بەهۆیەوە مامەڵە بە ماڵی کەسێکی دیکەوە بکات، بە سزای زیندانیکردن سزادەدرێت.