بەهۆی "سەردانەکەی سەرۆککۆمار"؛ ڕۆژنامەنووسان لە فێستیڤاڵی کەرکووک دەردەکرێن

ئاڤا نیوز

ئەمڕۆ سەرۆککۆماری عێراق سەردانی پارێزگای کەرکووکی کرد و بەشداریی لە فێستیڤاڵی "کەرکوک هێمای پێکەوەژیان" کرد، بەهۆی سەردانەکەی سەرۆککۆماریش ڕۆژنامەنووسان بۆیان نەبووە بچنە شوێنەکە و بەشێکیان لە هۆڵی چالاکییەکان "دەرکراون".

وێنە گەورەکە: لەتیف ڕەشید، سەرۆککۆماری عێراق، ئەمڕۆ شەممە سەردانی کەرکووکی کرد و لەگەڵ هەریەکە لە پارێزگار و بەرپرسانی دیکەی پارێزگاکە کۆبووەوە، دواتریش بەشداریی لە فێستیڤاڵی "کەرکوک هێمای پێکەوەژیان" کرد و تیایدا جەختی لە برەودانی زیاتر بە ئاشتی کردەوە و داوای بەشداری کارایی هاووڵاتیانیشی لە هەڵبژاردنی داهاتووی پەرلەماندا کرد.

ڕاگەیێنراوی فەرمی: ناوەندی نەخیل بۆ ماف و ئازادی ڕاگەیاندن بڵاویکردەوە، ڕێگریی لە چوونی ڕۆژنامەنووسان بۆ فێستیڤاڵی "کەرکوک هێمای پێکەوەژیانە" کراوە ئەویش بەهۆی ئامادەبوونی سەرۆککۆمارەوە بووە و ئەم ڕەفتارە سەرکۆنە دەکەن، لەکاتێکدا ڕۆژنامەنووسان بە فەرمی بۆ ڕووماڵی چالاکییەکە بانگهێشتکرابوون و ئەو ڕۆژنامەنووسانەی لەوێش بوون باس لەوە دەکەن لە هۆڵی چالاکییەکە دەرکراون.

ناوەندەکە دەڵێت، سەرۆککۆمار و پاسەوانەکانی لەم ڕەفتارە بەرپرسن کە دژی ئازادی کاری ڕاگەیاندنە و پێویستە داوای لێبووردن لە ڕۆژنامەنووسان بکرێت، گەرەنتی دووبارەنەبوونی ڕووداوی هاوشێوەش بکرێت.