لێدوانی نوێی گوتەبێژی حكومەت لەسەر دابەشكردنی مووچە

ئاڤا نیوز

گوتەبێژی حکومەتی هەرێمی کوردستان ڕایگەیاند، لیستی مووچەی مانگی سێ بە پلەبەرزکردنەوەوە بۆ بەغدا دەنێردرێت، سبەینێش لیستی مووچەی مانگی دوو ڕادەگەیێنرێت.

لێدوانی فەرمی: پێشەوا هەورامانی، گوتەبێژی حکومەتی هەرێمی کوردستان بە ئاڤا نیوزی ڕاگەیاند: ڕێککەوتن کراوە کە مووچەی هێزی پێشمەرگە و ئەوانەی دیکە کە نەنێردراوە بۆ هەرێمی کوردستان بنێردرێت، سەرۆکوەزیران بارزانی  لەگەڵ سەرۆکوەزیرانی عێراق لە پەیوەندی بەردەوامدا بووە و لێکتێگەیشتنی باشکراوە.

ئەوەی پێویستە بیزانیت: ئەمڕۆ لەناو کۆبوونەوەی ئەنجوومەنی وەزیران هیچ بڕیارێک لەبارەی پاشەکەوتی مووچە نەبووە.

بۆچی گرنگە: لیستی مانگی سێی مووچەی مووچەخۆران بە پلە بەرزکردنەوەوە ڕەوانەی بەغدا دەکرێت و پلە بەرزکردنەوە کاریگەری  لەسەر بڕی پێویستی بودجە بۆ دابەشکردنی مووچە دەبێت، بەشێکی زۆری مووچەخۆران مووچەکانیان زیاد دەبێت.

زانیاریی زیاتر: پڕۆژەی هەژماری من بە ئاگەداری حکومەتی عێراق کراوە و تا کۆتایی ئەمساڵ هەموو مووچەخۆران دەبنە خاوەنی هەژماری من.

گۆشەیەكی دیكە: ئەمڕۆ سەرۆكوەزیران بارزانی وەزارەتی دارایی و ئابووری هەرێمی كوردستانی ڕاسپارد دەست بەدابەشكردنی مووچەی مانگی شووبات بكرێت و ئامادەكارییش بۆ مووچەی مانگی سێ بكرێت.